La ambrera en el umbral de la Afrika

Agravada por falta de luvya i sovre todo a la sigida de konfliktos insesantes entre diferentes trivos, “la sekor de un tyerra desnuda komo despedasa debasho el polvo i la arena, sin yerva ni alguna otra vejetasyon” es la vizyon dramatika ke refletan en este momento munchos payizes Afrikanos.

Klara PERAHYA Judeo-Espanyol
27 Temmuz 2011 Çarşamba

Ninyos mueren sin kaji kudyos medikales, chikos puerpos eskeletikos kuvyertos de yagas i de moshkas ke sorven lo ke les kedo de sangre i de vida.

Ande esta el verdadero humanizmo? ande esta la verdadera solidaridad?

Si, tonas de trigo i de otras komanyas son mandadas de la parte de los payizes prosperos, ma es ke esto es sufizyente para rezolver el problema a la baza? Ke programa de edukasyon sosyal i paralelmente agrikolo fue gradualmente instorado al nivel de la komprensyon de los otoktones, sin por esto desdenyar ni destruir sus uzos i kostumbres ke konstituen el eskeleto espiritual de estas populasyones?