Batya Natan

Balak

Los ijos de İsrael vinyeron a el luguar nombrado Arvot Moav enfrente de la sivdad Yereho. Este paso ke dyeron los ijos de İsrael i las viktoryas ke estavan ganando kon la ayuda de Kriyador, izo retemblar muy munço a el puevlo de Moav. Los moradores de Moav, kijeron venserlos a los cudyos, kon unos remedyos afuera de la natura. 

Sovre esto, el rey de Moav Balak, se akonsejo kon el puevlo de Midyan, ke manera  azer por kitar de el mundo a el puevlo cudyo. Desidaron entre eyos de mandar a yamar a Bilam el echizero ke morava en Peor por ke maldiga a los ijos de İsrael. Mandaron unos grandes personajes de la sivdad de Moav i de la sivdad de Midyan i viyenen onde Bilam i le rogan al nombre del rey de Moav Balak, de vinir kon eyos a la tyera de Moav i maldizir a los cudyos. Las personas ke mando Balak le dizen a Bilam, nuestro rey Balak esta muy sigura ke a ken maldizes es maldiço, i a ken bendizes es bendiço. 

Bilam les dize ke el no es un eçizero sino ke es una profeta ke esta debaşo de el orden del Dyo Santo, ke esperen una noçe i el les respondera. 

El Dyo aparese su vizyon a Bilam i le demanda: Ken son estas personas ke vinyeron onde ti? Bilam le responde ke son mandados del rey de Moav por ke vaya i maldiga a Yisrael. El Dyo lo defende de ir a maldizir a los cudyos syendo el puevlo cudyo ya es un puevlo bendiço. 

A la manyana les dize Bilam a los mesajeros ke se tornen a sus luguar, ke el Kriyador no lo deşo ir kon eyos. Balak le manda otras personas i mas onorados, i le promete munça plata i oro de azerle todo lo ke demanda. Bilam ke sintyo estas prometas de el rey Balak, los detyene a los mesajeros una noçe i va se enforma, lo ke va kerer el Dyo de avlar. El Kriyador se aperese otra vez a Bilam i le permete de irse kon eyos onde Balak, ma a kondisyon ke no puede avlar mas ke lo ke le va ordenar el, el Kriyador. Bilam, a un ke ya entendyo byen ke la veluntad del Dyo es bendizir a el puevlo cudyo i no maldizirlo, kon todo la esperensa de la buena paga i de lo munço onra ke tyene ke resivir de Balak lo izo yerar i se levanto kon munça kovdisya i se va kon las personas de Balak. Bilam no reuşo a maldizir a el puevlo cudyo, syendo ke no lo deşo el Kriyador ke maldiga a el puevlo cudyo, Si no ke los bendişo a el puevlo kon estos biervos. O puevlo Santo de Yaakov kuantas ermozas i buenas i onestas son tus tyendas, i tus moradas. 


Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
1288