Es ansi del ombre ni andjelo ni bestya, la kavesa alta tornada verso el futuro i la klaredad, el puerpo,el, kargado de pulsyones instinktivas sometidas al kapricho de las sirkunstansyas.
El triste epizodyo de la arrestasyon de Dominique Strauss Kahn en los Estados Unidos (ay de esto kaji dos mezes) i todo lo ke el desperto en el entorno emosyonal, mos aze akodrar la prekaridad del destino humano i la frajilidad del ombre, el kual deve avrirse un kamino i fraguar su morada en el espasyo vital ande el se topa por un kurto tyempo.
“La akuzasyon judisyal del 14 Mayo bazada unikamente sovre la simple palavra de la kamarera del otel Sofitel, mujer de la kuala ninguno konosia realmente el pasado” fue una verdadera trajedia para el prezidente del Fundo Monetaryo Internasyonal “Dominique Strauss Kahn” ombre ke avia kaji alkansado el pinaklo de la glorya grasyas a su valor intelektual i ke en supito se topo presipitado al fundo del abizmo el mas obskuro
De mezmo, fue un momento de grande konsternasyon para kada uno de sus serkanos i mizmo para mozotros todos ke sin konoserlo personalmente no dubyimos a ningun momento de su sehel, kuando a la televizyon, komo tambyen sovre las primeras ojas de la mas parte de gazetas, lo vimos las manos atadas detras de la espalda, tal un vulgar kriminal, la kara kaji sin ekspresyon serrada al mundo eksteryor,.
Uvo komo torrentes de dubyo i mizmo a syertos momentos de inimistad ke subitamente, (antes de azer la mas chika enkuesta) se abatyeron sovre el, kada uno adjuntando i adjustando su rasyon de suspisyon, sin mizmo konoser el fakto en su realidad otentika, ni toparse delantre kualkyer prova tanjible akablante.
Al empesijo, a ningun momento, la protestasyon de inosensya del inkulpado fue tomada en konsiderasyon, tratado immedyatamente de “kulpavle” sovre baza unikamente (lo repeto) de la sola palavra de la akuzadora,
Momentos realmente trajikos de toparse delantre un majistrado ke pronunsyo una primera sentensya de kulpabilidad,al pareser kaji otomatikamente . Momentos tambyen trajikos kuando, unas kuantas oras mas tadre, el fue inkarselado en una horrivle prizyon i kuando olas de komentaryos mitad otentikos, mitad imajinaryos paresyeron en las gazetas o sovre los ekranes de Televizyon, materyal sovre el kual se baza jeneralmente la opinyon del grande Publiko.
El poder de la prensa es inkontestavlemente enorme en semejantes kavzos i de mezmo el de “face-book” ande kada uno puede eskrivir lo ke le pasa por la kavesa, kon o sin konviksyon, envezes para simplemente divertirse. La amenaza de una falsa inkulpasyon era grande para Dominique Strauss Kahn entregado ansi a la ira syega de una masa de personas superfisyalmente informadas.
Ma Vyernes demanyaya pasado,uvo komo una buelta en la atmosfera; en la Prensa eskrita i elektronika :”deklarasyon del rezultado frankamente negativo konsernando la moralidad de la akuzadora” a la sigida de las enkuestas echas por los investigadores mizmos de la majistratura.
Segun lo ke eskrivyo el New-York Time , la kamarera ke se kesho de aver sido seksualmente agresada por DSK avia avlado mentiras i avia dicho munchas kozas falsas en su deklarasyon debasho djura.... se deskuvrio mizmo ke poko tyempo despues sus primeras keshas, eya diskutyo por telefon kon su kompanyero de vida ( inkarselado por trafiko de droga) konsernando los benefisyos posivles a realizar en abatyendo Strauss Kahn delantre la Djustisya....lo ke fue el kavzo, ma la deskuvyerta de la verdad troko immedyatamente la facha de la situasyon i el inkulpado rekupero ansi la libertad de sirkular en ke lugar ke sea de los Estados Unidos
En una de las odiensas destinadas a egzaminar las kondisyones de la libertad kondisyonal akordada a Strauss Kahn, los djuzgos deklararon mizmo ke en este momento ay seryozos dubyos ke egzisten sovre la kredibilidad de la akuzadora i ke se konstata ke los elementos de este “dosye” evoluaron en un sens kontraryo al del empesijo..
Ma, ay unos kuantos dias de esto, Lunes el 4 djulyo, muevo epizodyo, esta vez en su propyo payis. Tristane Banon , mansevika de 32 anyos, tomo la desizyon de avrir una aksyon en djustisya kontra el eks patron del FMI por una tentativa de agresyon seksual en el anyo 2003.
Si tal fue el kavzo, deke no averlo denunsyado immedyatamente? Es ke esta demanda sera resivida por la djustisya ? los dias avlaran.
Dominique Strauss Kahn paresia tener en el, el presentimyento de lo ke devia produzirse mas tadre. Poko tyempo antes estos evenementos, kuando se topava ainda en el punto kulminante de la glorya, el avia dicho a sus amigos “3 kozas pueden impedir mi adelantamyento: <mi frajilidad delantre el elemento feminino>, < la rikeza de mi mujer> i...<mi identidad djudia (ma judeité)>”.
