Ay 5 anyos ke sovre la tyerra mizma de su payis, el soldado Gilad Shalit fue arrevatado salvajemente por un grupo de kombatientes del Hamas.
5 anyos ke este mansevo esta enserrado, entregado a manos enemigas , sin tener novedades de su famiya, sin kontakto kon kualkyer myembro de una de las asosyasyones humanitaryas kreadas djustamente para akudir todo modo de persona en estado de desmamparo i de peligro.
5 anyos ke una madre i un padre estan asperando su retorno ke devyene (kada dia ke pasa) mas improbable, sin novedades de sus ijo, sin saver mizmo seguramente si el esta ainda en vida.
5 anyos de falsas esperansas meskladas a la angusya eya permanente, 5 anyos de una nostaljia undida en el dezespero.
El prezidente de los Estados Unidos Barack Obama, komo el de Fransa Nicholas Sarkozy intervinyeron repetidas vezes para kel Hamas permeta una de las grandes asosyasyons karitativas mundyales a vijitar el prizyonero i konstatar el estado ande el se topa, ma no obtuvyeron ningun rezultado.
Undido en la sufriensa i la dolor, Noam Shalit, padre del desmazalado soldado Israelyano inkarselado, reklama de su governo ke el aksepte el interkambyo de su ijo kontra kaji mil prizyoneros palestinyos, entre los kualos 450 terroristos sanginaryos, kondisyon ke egzije el Hamas .
Ke puede azer Netanyahu? Por ke solusyon optar? Deshar pudrir en las profunduras oskuras de una prizyon enemiga un inosente arrevatado en el egzersizo mizmo de su funksyon? O byen liberar 450 kriminales ke yevan sangre israelyana sovre sus manos i ke puedran de muevo residivar?
Kuala ke sea la desizyon ke el tomara, la solusyon sera syempre trajika. El es responsable del suerte del soldado Gilad irreprochavle en la egzekusyon de su dover, komo es tambyen responsable delantre el puevlo Israelyano por el kual la libertad de 450 terroristos konstitue un peligro.
El dilemna devyene trajiko, kuando entre dos solusyones, kuala sea la ke sera eskojida, la otra se topara fatalmente en perdisyon”.
Es ke el destino del puevlo djudyo es de syempre toparse delantre problemas difisiles i mizmo envezes imposivles a rezolver?
La sola solusyon posivle sera puede ser, una fuerte intervensyon simultanea de varyos Payizes Ajenos ke se adjuntaran en este objetivo i puedran azer entender al Hamas ke egziste un akordo internasyonal konsernando el respekto i la sovreguarda de la vida i de la dinyidad de kual prizyonero ke sea, el kual puedra ser vijitado por myembros de varyas institusyones dedikadas al kontrol de la situasyon.
I tambyen egziste un otro remedyo, el mijor “yegar a estableser la paz” ... “el odyo no puede nada kontra el odyo, solo la kerensya puede venser el odyo” disho un vyejo pensador Hindu.
