La chan (kampana) ya sono
Sihula no eskolo
Uay de su madre
La ija ya bolo
Kon su estruktura primitiva i sus palavras sin sinyifikasyon apropyada, este vyejo refran ke empleava mi nona, ekspresa toda la anksyedad de la kriansa humana. Si, el espanto i la inkyetud estan syempre prezentes en mozotros, en muestro entorno, en la sonriza forsada de kada persona; eternal kompanyeros sin kara ni solombra, eyos paresen ser enganchados a muestro puerpo Despues del anunsyo de la muerte de Ussama Benladen, sentimyentos diferentes i mizmo en vezes kontraryos los unos a los otros, empesaron a espuntar en kaji kada uno de entre mozotros. Al prinsipyo fue la alegria del triumfo de Obama, en este kavzo: “simbolo del Byen en su lucha kontra el mal”, “viktorya del mundo sivilizado i humanisto kontra la barbaria” .... ma poko despues, empeso un sentimyento de insertidumbre i mizmo a syertos momentos, una sensasyon de angustya...esta angustya egzistensyal propya a la kriansa pensante ke se save vulneravle i impotente en la grandeza mizma de su konsyensya del peligro... Ken va suksedir a Ben laden? De ande vyendra el futuro golpe? Kual sera su kampo de aksyon i tambyen la dimensyon del danyo ke sera kavzado? Mos demandamos tambyen: Es ke esto todo no es el rezultado de una mundyalizasyon loka? De lo ke yaman el progreso? “Kestyones sin repuesta” ke mos asperan en kada kanton de kaleja... Una de entre eyas mos vyene munchas vezes al tino: ”Eske el progresso syentifiko i tekniko de estas ultimas desenias fue realmente jenerador de adelantamyento en el kampo de la sivilizasyon otentika, la ke tyene sus fundamyentos en el humanizmo?” O por dezir la koza de una manera mas klara:“Es ke la humanidad en su totalidad estava pronta para resivir este progreso? Por seguro “Si” en syertos ramos komo “la medikeria” i en munchos payizes el konsepto de “igualidad entre todos delantre la ley”, ansi kel de la libertad de ekspresyon i del ovligo del respekto enverso la dinyidad de los otros....ma en los otros kampos? Mos dizen ke todo modo de revolusyon konose un periodo de dezekilibro i mizmo envezes de terrorizmo, komo fue el kavzo (unos kuantos siglos antes) de la revolusyon Franseza ke tuvo tambyen su hora de terrorizmo... No se trata del mizmo terrorizmo, el de akel tyempo era una revendikasyon del derecho a la libertad i a la djustisya. El tenia un eskopo a alkansar. “El aktual” es un terrorizmo syego, sin objetivo definido ni por seguro valido, konsekuensa inevitavle de un fanatizmo kriminal ke kere todo destruir sovre su pasaje, un fanatizmo ke derroka por el solo plazer de derrokar, komo avia sido, dyez anyos antes, la destruisyon de las dos torres del World Trade Center. La inkyetud esta en kaji kada lugar de la Evropa, un grande sosyologo mos dize ke los partidos ultra-nasyonalistos estan suvyendo en munchos payizes asta agora muy hospitalyeros ke empesaron a serrar sus puertas. No se trata de gzenofobia ma de simple espanto, del espanto de ser golpeados sovre sus propyas tyerras, i esto malorozamente avre la puerta al ostrasizmo. Una ultima kestyon: Asta ande va ir este espanto?
