Konsekuensa puede ser inevitavle de la mundyalizasyon, lakuala okazyona kontinualmente enkontros entre personas de orijen, edukasyon i rituales ke no son semejantes, las palavras de kualkyer lingua se enrikesyeron eyas mizmas de muevas sinyifikasyones i de diferentes interpretasyones.
Una de las palavras, o por ser mas eksplisita, uno de los konseptos ke provokan aktualmente grandes kontroversyas de interpretasyon, es por seguro el konsepto de “laisidad”.
El byervo “laisidad” tyene dos sinyifikasyones:
A) La primera byen konosida i klasika es la “separasyon absoluta” ke se produzyo en varyos payizes del mundo oksidental, entre la “Governansa politika” i la “Otoridad relijyoza”.
Segun esta primera sinyifikasyon los dirijentes de un governo se topan aktualmente enteramente liberados (en sus lavoro i desizyones) de las preskripsyones o paradigmos espirituales…
Etimolojikamente esta palavra vyene del Grego “laikos” ke sinyifika “puevlo”… Ferdinand Buisson uno de los lejisladores de las primeras leyes laikas de Fransya mos dize ke se trata de la sekularizasyon de las institusyones politikas de un payis, las kualas deven tomar sus desizyones i lejiferar ahuera de kualkyer imperativo relijyozo.
B) Vinyendo a la segunda sinyifikasyon del mizmo byervo, ulteryora a la primera, eya toma en konsiderasyon el problema del desplasamyento kontinual de grandes kuantidades de populasyones, de sus payizes de nasimyento a otros payizes, lo ke krea una grande diversidad de kreensas en un mizmo espasyo vital.
Es ansi ke (afin de asegurar una armonia kompleta en esta varyedad munchas vezes muy kompleksa) “Laisidad” sinyifika tambyen “organizasyon komun ke permete a kada individuo de afirmar su apartenensya o byen su obsyon espiritual, sin a ningun momento tener el derecho de impozarla a los otros” lo ke asegura una libertad de konsensya i de ekspresyon bastante ancha, syempre en el kuadro de las leyes del payis ande se topa i en el respekto absoluto del “Otro”.
En rezumen, segun esta segunda aksepsyon de la palavra, la “libertad de praktikar kada uno su relijyon” keda intakta, en las limitas ande el orden publiko es mentenido.
Varyos myembros del aktual Governo Fransez kijeron organizar un debate kolektivo a este sujeto afin de asegurar una total transparensya i ayegar ansi a un konsensus kaji jeneral, de ande todas la sensibilidades saliran sufizyentemente satisfechas, lo ke kavzo (por razones ineksplikavles) protestasyones vehementes de la parte de munchas personas i partikularmente del partido sosyalisto.
Oy en dia la Fransya konose a este sujeto un problema de grande agudeza. Todo en asegurando su entera kontribusyon a fasilitar la kreasyon de sentros ande los sivdadinos de konfesyon Muzulmana puedran orasyonar i praktikar el ritual de sus relijyon en el respekto total de sus kulto, eya por kontra tomo la desizyon de prohibar el Niqab*, bazandose sovre las afirmasyones kategorikas de varyos Doktores de la Ley Islamika segun los kualos en ningun kavzo esta vestimyenta no konstitue un ovligo relijyozo.
La reaksyon fue muy fuerte, esta desizyon provoko kontestasyones brutales en Fransya i mizmo ahuera de Fransya. Una partida de la prensa Amerikana manifesto avyertamente su dezaprobasyon i afirmo ke una semejante prohibisyon es kontrarya a las reglas fundamentales del laisizmo. ”Kada uno es libre de vestirse komo le gusta” fue su argumento prinsipal, sin tomar en konsiderasyon la impresyon negativa i mizmo el peligro ke puedran konstituir estas formas humanas de laskualas no se puede ver la kara, embrujadas en los pligos de un panyo la mas parte del tyempo de kolor obskura.
De otra parte, en un kuadro enteramente diferente, este anyo en Fransya, la data de los konkursos para pueder entrar en las Grandes Eskolas de Indjenyeria i otros ramos de la syensya, koinsidyeron kon la fyesta de Pessah, lo ke no permete a los estudyantes de konfesyon djudia ke son profundamente atados a las preskripsyones de sus relijyon, de partisipar a este egzamen de una importansa kapital para sus futuro.
Visto ke las datas de las fyestas de todas las minoridades ya fueron prealablemente komunikadas a tyempo a las Otoridades del payis, el grande Rabbino Gilles Bernheim, el Prezidente del Konsistoryo Sentral Joel Mergui i el Prezidente del CRİF Richard Prasquier deklararon (en perfekto akordo kon la ley a este sujeto) ke no es admisivle de impedir ansi estudyantes ke (todo en tenyendo fuertes aspirasyones relijyozas) se aparejaron durante dos a tres anyos para partisipar a este konkurso i demandaron la posivilidad de organizar para eyos un egzamen partikular, lo ke provoko ainda mas olas de protestasyon, pretendyendo ke esto sera una mezura indjusta, kontrarya al esprito de laisidad.
Estranyas mentalidades ke luchan i pelean en favor de una vestimyenta puede ser de karakter tradisyonal, ma ke (segun lo ke dizen grandes savyos Muzulmanos) no konstitue ningun ovligo relijyozo… i ke de otra parte, (malgrado ke la data de pessah ya fue komunikada a tyempo a las Otoridades konsernadas) refuzan a estudyantes de fuerte obedensya relijyoza djudia, la posibilidad de partisipar a un konkurso determinante para sus formasyon profesyonal.
* Niqab - Vestimyenta ke eskonde totalmente
el puerpo I la kara feminina, salvo una chika
avyertura al nivel de los ojos
