Dos mezes despues la real pasasyon del Poder Prezidensyal del Neve Şalom Vakfi, de la parte de “Jozef (Jojo) Nasi“ a “Daryo Katalan”, Martez la nocha el 15 del mez koryente, fue esta vez un grande omenaje de agradesimyento al Prezidente salyente por su ermozo “lavoro de Jerensya” de una de las mas grandes İstitusyones Djudias de muestra kolektividad.
Los salones del Sentro Kultural del Neve Şalom Vakfi estavan yenos de damas i sinyores muy elegantes, en una atmosfera imprenyada de konvivyalidad, amistad i ermandad. No se si todos los kombidados se konosian los unos los otros, ma todos estavan prontos a saludarsen, sonreirsen i avlarsen.
El Neve Şalom Vakfi partaja kon el Konsilyo Laiko, la responsabilidad de la jerensya interyor de muestra Komunidad. El tyene en karga (komo me lo disho Şeli Gaon) la vida i el ritual relijyozo djudyo de todos los myembros de muestra kollektividad, Berit-Mila/vijola, Bar Mitzva- Bat mitzva, Bodas, Funerales, dias de fyestas komo dias de tristeza.
Grasyas a la maraviyoza aktividad de una de sus propyas kreasyones, renovelada serka 45 anyos antes, ningun djudyo de Estambol i mizmo de Turkia no konose mas ni la ambre ni la soledad, ni tambyen la mankura de abrigo.
Sin distinksyon de edad, de kondisyon sosyal ni de nivel relijyozo o kultural, todo modo de djudyo ke se topa en el menester es akseptado al seno de un sentro kaji luksyozo ande el resive proteksyon fraternal ansi ke todos los kudyos menesterozos fizikos i afektivos.
Ay de esto munchos anyos, tuve la okazyon de meldar la Palavra de un grande savyo Djudyo de la Edad Medya. A la kestyon ke le formularon: “ken” syentes ser tu ermano?, el avia respondido en este senso: “ todos...el grande komo el chiko, el savyo kom el inyorante, el djusto komo el pekador”
Es ansi de muestra Komunidad: Konsilyo Rabbiniko, Konsilyo Laiko, Neve Şalom Vakfi, Göstepe Kültür, Eskola, Hospital, Azilyo de Hasköy, Mishne Torah, Orfelinato, todas las avras, todos los sentros kulturales o esportivos ets...ets.. todos unidos por una mizma voluntad de solidaridad i un mizmo dever moral de ayudarsen los unos los otros.
Si.... el omenaje a Jojo Nasi fue grandiozo i byen meresido. El tambyen agradesyo uno por uno sus kolaboradoras i kolaboradores ansi ke kada myembro del Personal.
I por terminar, el izo el elojyo de Daryo Katalan el aktual prezidente ke tomo su suksesyon
En el diskorso de Daryo Katalan se sentia la emosyon i en mizmo tyempo la voluntad i la fuerte determinasyon de asumir la Karga Prezidensyal en la totalidad de lo ke eya signifika.
Toda muestra gratitud a ti ”Jojo Nasi” por tu ermozo lavoro ....”Besiman tov” Daryo Katalan!
P.S. No ay menester de avlarvos del pasto i de la ermozura de la prezentasyon del menu.
El era sinyado “Barınyurt”.
