Vayikra

Rav Yeuda ADONİ Köşe Yazısı
9 Mart 2011 Çarşamba

Elevar a nuestros ninyos kon santedad i limpyeza:

İ yamo el Kriyador a Moşe. Kon este verseto enpesa la perasha Vayikra, ke es tambien la perasha primera de el treser livro de la Tora. Dizen nuestros savyos, kuando se ensenya el estudyo de la Tora a los elevos, se enpesa de el livro treser de la Tora, el livro de Vayikra. Porke  disho el todo poderozo, ke vengan los limpyos, las almikas sin pekado i ke se entremetan en la limpyez i pureza. Ansi es el uzo. En el livro “Beera shel Miryam” dize, de aki nos enbezamos la ovligasyon ke tyenen los cinitores, de dar el estudyo relijyozo a sus kreaturas. Kuando enpesa una kreatura a el estudyo de la Tora, deve de enpesar kon santedad i limpyeza i pureza ke es enkomendansa de el Kriyador. “Ke vengan los limpyos i ke se entremetan en la limpyeza” Por las almas limpyas de los ninyos devemos de azer todo lo ke es posible,i de konservar sus espritos, kon pureza, limpyeza, i santedad.

Las bozizikas lindas, de las kreaturas ke meldan Tora, alegra nuestro korason.

El livro de Vayikra ke trata de los sakrifisyones nos enbeza, ke kuando egzistiya nuestro santuvaryo, los Korbanot alimpyavan las almas i los espritos de las personas de sus pekados i dilitos. Le jenerozidad es una kualidad ekselante para la persona. Komo dize el verseto por la fragua de el santuvaryo. “De kada persona ke envelota su korason.,el ke ayega su korban de alma i de korason se konta komo se ayegar asi mismo a el Kriyador. En la Tora vemos munchas enkomendansas ke no es taksada su kantidad. Kere dizir el Kriyador lo desho a su posibilidad de la persona. Ansi ke munchas korbanot, se ayegaran sigun la veluntad de el ombre. Si no ay ninguna ovligasyon porke razon fuimos enkomendados?

Rabi Yaakov Kanyaboski responde a esta demanda dizyendo: La jenerozidad ke aze el ombre por nombre de el Kriyador, malgrado ke no es enkomendado, es un servisyo ke esta azyendo a nombre de el Kriyador. İ su korason se le inche kon amor de Dyos. İ tyene syempre espanto de el Kriyador.

La Tora nos enkomendo de amar a el Kriyador. Komo lo meldamos en la şema ,vaza amar a tu Dyo. Es ovligado el ombre de alkansar a este sintimyento.

La jenerozidad lo trae a el ombre a estas buenos sintimyentos.