Baruh Pinto muryo en Israel

Klara PERAHYA Judeo-Espanyol
9 Mart 2011 Çarşamba

Vyernes demanyana el 4 del mez koryente, Baruh Pinto tio de muestro kerido Bensiyon Pinto, serro sus ojos por syempre en Tyerra Santa, entornado de la kerensya i de los kudyos de su ija, su yerno i sus dos inyetas, ma konformamente a su voluntad, su puerpo fue enterrado en Turkia, su payis de nasimyento ke el sirvyo kon fidelidad i ande el konosyo los dias los mas alegres de su vida, mano kon mano kon su mujer, la defunda Sonia Pinto.

Figura emblematika de muestra komunidad, a la kuala el era atado de todas las fibras de su personalidad, Baruh era de una derechedad kaji intransijente. Orgolyozo i duro enverso el mizmo, el era tambyen severo enverso los otros sin nunka kayer en la indiferensya; al kontraryo el fue syempre kudyozo i tornado verso sus semblables..

Debasho una aparensya de rijidez, el era profundamente humano, pronto a ayudar en to modo de sirkunstansya.Al pareser, es una tradisyon en la famiya Pinto de syempre korrer para akudir los ke se topan en estado de desmanparo o de reselo. Ansi era Baruh, ansi son su ija Ofra i su sovrino Bension.

En sus anyos de aktividad profesyonal, el fue direktor de la firma Grunberg. Metikulozo, muy mitikulozo en su lavoro, el era muy apresyado por sus patrones i sus klientes. İ kuando sono la ora de su jubilasyon, el refuzo la dulse inaktividad de un repozo byen meresido i se konsakro enteramente a la Investigasyon Historika del pasado de muestro puevlo, komo tambyen al orijen de las alkunyas djudias.

El desho a muestra Komunidad tres livros de grande valor, intitulados:

“The Sephardic Onomasticon”

“Annuaire de la Diaspora Juive Mondiale”

“What’s behind a name”

Munchos de muestros korelijyonaryos guadraran en sus memorya el rekuerdo de su alta silueta, komo tambyen el sonido de su riza sonante. Sus amigos nunka se olvidaran de el.

Todas muestras kondolensas i la ekspresyon de muestra muy profunda amistad a su ija Ofra i su yerno Michael Friedmann, sus inyetas i inyeto Yasmin & Lior Ashkenazi i Leeann Friedman, su ermana Vicky Kimhi ansi ke a sus sovrinos Eti & Bension Pinto, sus ijos i ermueras.

Ke la alma de este grande luchador repoze en paz.