Batya Natan

El mez doble de Adar

Si no me esto yerrando me parese ke antes unos, kuantos anyos eskrivi un artikolo sovre el mez de Adar. Es el sejen mez, a partir de Roshashana ( Tishri). Konsiderandolo a partir de la salida de Misraim (Nisan), es el dodjen mez. Adar, komo la mayoriya de los mezes Ebreos, tyene un orijen Babiloniano sinyifikando granero. Se aparejan los kampos para la sembradura i syendo el ultimo mez del invyerno sinyifika tambien: ennuvlado i eskuro.

En Adar, espesyalmente en Yerushalayim, se enkasava (tahsil etmek) los shekalim  para el Sanktuaryo, kon el buto de merkar ofrendas publikas i otros menesteres. Tambien en Adar, afin de aprontar para los pelegrinos (hacılar, ziyaretçiler) de Pesah, se reparava los kaminos, las kayes, las fuentes danyados kon las luvyas del invyerno. Dizen ke kuando vyene Adar puja la alegriya. En este mez se kumplieron maraviyas para el puevlo Djudio. El miraklo (mucize) de Purim ke fyestamos en Adar, es uno de estos… En el 13 de Adar es el Taanit Ester. “Andad  i arrekojed  a todos los djudios ke estan en Shushan i azed taanit vozotros por mi. Yo i mis donzeyas, azeremos taanit de mizmo”. (Livro de Ester: 4:16).

En el 14 i 15 de Adar selebramos la fyesta de Purim. El sinyo zodiako de este mez es el “Peshe” (balık) 20 Febrero- 20 Marso i tyene un nombre al plural (çoğul): “Piscis”, en aluzyon  de abundansa. Los sinyos del zodiak son internasyonal, todos los puevlos i nasyones los konosen. Bueno, el anyo “Embolik” (si no me yerro) se topa solo en el kalendaryo Ebraiko. Naturalmente, de syempre supe la egzistensya del anyo embolik, del Adar Bet o  kon el nombre ke lo konosemos, Veadar. Me lo ekspliko mi avuelo en mi chikez i mi padre mas despues. Meneyi la kavesa en dizyendo: “ya entendi!”. Ma en realidad no aviya entendido nada!! Al pareser estava muy komplikado para mi. Ma agora mas o menos ya konosko la sinyifikasyon del Anyo Embolik i del byervo “Shneiadarim” ke kere dezir “doble Adar” i va provar de eksplikarlo.

Bazikamente (temelde), el kalendaryo Ebraiko es atado al torno de la luna al derredor de la Tyerra.  Este torno se kompleta kaji en 29,5 diyas, dunke 354 diyas en 12 mezes. 11-12 diyas mankos ke el kalendaryo solar: 29,5x12=354. Por dar un egzempyo, oganyo, anyo 5771 tenemos Veadar. Dunke 13 mezes donde, 5 mezes de 29 diyas i 8 mezes de 30 diyas.

Para adaptar (uygulama) el anyo lunar al anyo solar, los savyos al presipyo adjustavan periodikamente (dönemsel) un sigundo mez de Adar. El eskopo era  azer kayer la fyesta de Pesah en la Primavera, ansi ke las otras fyestas Djudias en las sezones ke konvenia. Despues este “dekalaje” se estableso definitivamente en un siklo (döngü)  ke se renovela en kada 19 anyos. Se interkalo (yerleştirmek) 7 vezes un 13en mez adisyonal  ke es el Veadar. De esta manera, los 19 anyos korresponden  a los 228 mezes del anyo solar. 19x12=228.

En el anyo Embolik la fyesta de Purim kaye en Veadar, de manera a konservar el mez ke la separa de la fyesta de Pesah. En preparando este teksto, otruna vez realizi ke no ay edad para ambezar kozas muevas i munchas vezes ke travan la kuyozidad de la persona. Ma transmeter las konosensyas es un poko mas difisil i komporta syertas responsabilidades: no azer yerros en la mezura del posivle. Espero ke, en este espasyo limitado  mis eksplikasyones fueron bastante klaras i no ize munchos yerros.. Esto regretando de no konoser  en ke lugar del korso de los 19 anyos mos topamos oganyo.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
434