BET-EL

Dora NİYEGO Judeo-Espanyol
23 Şubat 2011 Çarşamba

Genisis 28/12

Yaakov se sonyo

‘i aki, una eskalera konstruida enriva de la tierra, i la otra punta alkansando a los sielos, i de aya, los anjelos estavan suviendo i abashando’.

Sovre este divino esuenyo, Yaakov se desido de dar el nombre ‘Bet-El’ (la kaza del Dio) a este lugar.

Los diyas ke pasimos, la Administrasion de la Fondasion ‘Kadikoy Hemdat İsrael Sinagogu’, tomando la afirmasion del Grande Rabino, se desido de dar el nombre Bet-El a la Sinagoga de Caddebostan.

Este evenemiento se va selebrar el 25 de Febrero, noche de Shabat, en el komplekso de la Sinagoga, kon la partisipasion del Grande Rabino.

El 26 de Febrero, Shabbat demanyana, durante la tefila de Shabbat, a lakel el Grande Rabino va partisipar, este nombre se va anonsar a los yahites.

La Sinagoga Bet-El, ke fue nomrada komo ‘Caddebostan Sinagogu’ por munchos anyos, fue konstruida en el anyo 1953.

El empesijo de la konstruksion, komo kada empesijo, no fue muy fasil. Antes de kontarvos la estorya de esta Sinagoga, me va ir a unos kuantos anyos antes de este evenemiento.

En el anyo 1950, los miembros de la Administrasion de la Sinagoga Hemdat İsrael, se desidaron de restorar el edifisio de la vieja eskola judiya de Kadikoy, Yeldegirmeni. Los mansevos de este kartye no teniyan un klub ande se ivan a pueder arekojer. La Administrasion penso ke este edifisyo iva ser ideal por los mansevos. Ma, komo la komunidad de Kadikoy no teniya bastante moneda por la restorasion, la administrasion propozo a los mansevos de arekojar donasiones de los miembros de la komunidad. Malorozamente, este grande montante no se puido arekojer, i el dezeyo de los mansevos no se puido realizar. Ma, el kadar ke se puido arekojer, se guadro en la kahsa de la komunidad.

Por munchos anyos, las famiyas judiyas de la parte evropeena de Estambol, se fueron a la kampanya a la parte anatoliana de Estambol. Estas famiyas alkilavan kazas en Caddebostan, Goztepe, Saskibakkal, Suadiye, i Bostanci, para pasar el enverano, i pueder tomar banyos de mar.

Duspues del anyo 1948, la populasyon de los enveranoderos empeso a pujar, i naturalmente, la komunidad de Kadikoy empeso a bushkar remedios para pueder responder a la nesesidad de una Sinagoga, en esta vanda de Estambol. Kada Shabbat, munchos enveranoderos se estavan indo a pie a la Sinagoga Hemdat İsrael de Kadikoy, i unos kuantos se estavan arekojiendo en la kaza del Sinyor Yasef Behar. En esta kaza, estavan aziendo las orasiones ma sin Sefer Toras.

Fin al anyo 1951, las orasiones de las fiestas Rosh Hashana i Kippur se izieron en diferentes kazas alkidadas por los enveranoderos. Ma, de diya en diya, la nesesidad por una Sinagoga estava pujando.

Enfin, tres filantropistos, Sinyores Yitshak Tsiyon, Semuel Kaneti, i Moiz Kazado se adresaron al Prezidente de la Komunidad de Kadikoy, ke era Dr. Yomtov Garti akeyos diyas, i demandaron su permision por la konstruksion de una Sinagoga. La komunidad no teniya un butdje sufizante por pueder merkar un tereno, i pueder empesar la konstruksion. La sola moneda en la kahsa era el montante ke aviyan arekojido los mansevos para fondar un klub de mansevos.

Este montante fue el primer paso por la la konstruksion de la Sinagoga de Caddebostan. Un filantropisto, Sinyor Moiz Behar Ebeoglu, vendyo su tereno a la komunidad por muncho manko de su valor reel. İ ansi, el Grande Rabino de akeyos anyos, Rav David Aseo, anonso esta nuvela al publiko.

Una komite de dodje personas, arekojeron un montante entre eyos, lo ajutaron al montante guadrado en la kahsa, i ansi empeso la konstruksion de la Sinagoga. El arshitekto Albert Arditi, aparejo un proje, i en el anyo 1953, la konstruksion empeBso. En la fiesta de Rosh Hashana del anyo 1954, la Sinagoga de Caddebostan se avyo al servisio.

La konstruksion de esta Sinagoga fue el empesijo de una komunidad mueva, fondada por munchos miembros vinidos de diferentes partes de Estambol. Oy, la Sinagoga de Caddebostan, (kon su muevo nombre, Bet-El), es un grande komplekso, kon su kozina kasher, su Mikve, su salon de Seudas i de otras aktividades sosyales, su libreria, i su kamareta ijienika por Berit Milas.

(Esto remersiando el Senyor Moshe Palchi, por todas las enformasiones ke me dio sovre este sujeto).