La Paz se konstruize kon djustisya i komprensyon

Klara PERAHYA Judeo-Espanyol
15 Aralık 2010 Çarşamba

......... Esto es lo ke dize el Eternal:

......... No maltretes el estranjero, el guerfano o la bivda .........  

( Yeremia 22/3)

 

Ken puedia pensar ke un dia, djudyos ivan a tener la triste ovligasyon de protestar kontra djestos de rasizmo perpetrados por otros djudyos enverso sitizanos de relijyon diferente?

Es un poko ansi en este momento, konsernando la petisyon sinyada por 47 rabbinos debasho la otoridad del Grande Shefe relijyozo Ovadya Yosef, prekonizando de no vender ni alkilar kualkyer domisilyo a sitizanos ke no son djudyos.

Segun esta petisyon “si un djudyo vende o alkila una kaza a uno ke no es djudyo, sus vezinos deven avizarlo del peligro ke komporta su akto, i konvenserlo de annular su desizyon. İ si persiste, el vezindado deve kortar todo modo de kontakto kon el.”

Entre las diferentes razones dadas para justifikar esta prohibisyon (yasak): “el peligro de kazamyentos mikstos” i tambyen “el espanto de una probable baratura de los immobles”.

Uno de los primeros a kritikar i kondenar esta “desizyon relijyoza”, fue el Prezidente Shimon Perez ke, una vez mas, afirmo ansi su humanizmo i la importansa ke el da a todo modo de problema ke se refera a la Etika i la djustisya.

De mezmo, un komunikado de prensa publikado por el Muzeo “Yad Vashem” konsidera esta mizma rekomendasyon de no vender ni alkilar domisilyo a kualkyer persona de otra kreensa ke bive en Israel, komo un golpe a muestras valores fundamentales.

El mensaje de Yadveshem mos dize:

“La eksperyensa mos mostro la immensa importansa de las valores komo el respekto del Otro, i la koegzistensya mutual”

Komo Shimon Perez i la direksyon del Muzeo de la Shoa, una multitud de nombrozos deputados de munchos otros partidos komo “Kadima”, Meretz” ets.... manifestaron sus deskontentes i sus protestasyones enverso los ke firmaron la dicha petisyon.

No mos olvidaremos kel fundamyento mayor del Djudaizmo es prinsipalmente: “la Djustisya” i el “Humanizmo”, estos dos preseptos de baza ke aseguraron, asta agora, la perenidad de muestra Fey.

La Biblia mo lo ambeza kuando mos rerpeta en kaji todos los kapitolos de los sinko primeros livros, la sakralidad de muestros deveres enverso el ajeno ke bive en muestra sivdad i el ovligo de asegurarle la igualidad de derechos delantre la djustisya ... “Violar este presepto de baza” es sin ningun dubyo renyegar la esensya mizma de muestra Ley.

Munchos van a demandar: “Es ke no tenemos el derecho de defender muestra identidad?” Por seguro Sİ ,esto es mizmo un dever imperativo, ma sin arrebashar ni humilyar ken ke sea.

“Respektar el derecho del otro” no es renunsyar al muestro, ni meterlo en peligro, ma al kontraryo renforsarlo... i puede ser, meter la primer pyedra para krear una situasyon mueva, mas klara i mas humana de las dos partes.

El Rebbi, en su konsensya de ombre de Ley, tyene la funksyon de kalmar los espritos en rebuelta . Su primer objetivo deve ser de transmeter los preseptos de Etika sovre los kualos repozan muestras kreensas.

En su kuesta de la djustisya, el Djudaizmo es para kada uno de sus myembros “un largo kestyonamyento, en la soledad de su konsensya” afin de topar el kamino el mas djusto a segir.