Si,ansi hue Myerkoles el primo del mez koryente, en el “Barınyurt” ande realmente todo era “ermozura, hen i armonia”: el resivo kalorozo de los myembros dirijentes, la konvivyalidad de uzo en este espasyo bendicho, la atmosfera jeneral de un dia konsagrado a la amistad.
Pransos adornados kon arte i minusia, flores en todas las mezas, ambiente de fyesta, servisyo impekavle.... la prezidente kontinualmente kudyoza del konfort de kada kombidada i sovre todo la ermoza ekspresyon de kontentes sovre la kara de “Miryamika” simbolo de este maraviyozo lugar de avrigo.
El menu era adekuado al tema del dia, desveloıpado por una amavle dietetisyana Dilara Koçal ke mos avlo kon palavras simples i en mizmo tyempo kon muncha humor de las chikas difikultades i tambyen de los grandes avantajes de una alimentasyon byen ekilibrada rika sin ekseso de todo lo ke asegura la buena salud i ansi la ermozura de la persona.
Si, myerkoles pasado, todo era ermozura, hen, armonia i tambyen kerensya i amor en el Barınyurt.
