Entre los multiples eventos ke se produzyeron estos de alkavo dias, kada uno kon su importansa temporera o permanente, uno de entre eyos parese realmente ser portador de un muevo premisyo de esperansa para el futuro.
Ainda minimo para munchos, kaji imperseptivle para otros, el yeva en su seno la posivilidad de una mueva evolusyon de “la manera de pensar de milyones de personas” i mizmo de una mueva analizis de syertos konseptos relijyozos.
En su livro intitulado “Luz del Mundo” ke vyene de pareser, Benedictus XVI admete ke la utilizasyon del prezervativo es permetida en algunos kavzos.
Es la primera vez en la Historya de la Eglisya katolika ke una semejante deklarasyon fue echa de la parte de la mas grande otoridad del Kristyanizmo.
A mi pareser , puedra ser de mezmo por todas las otras relijyones monoteistas ke preskriven imperativamente la interdiksyon de deshar pedrer el potensyal de vida ke yeva en el “kualkyer akto de amor fiziko”.
La kriansa umana no es solo una entidad espiritual, eya es tambyen echa de instinktos ansi ke de un puerpo kon sus pulsyones seksuakes munchas vezes irrezistivles ke pushan envezes los kreentes a kometer aktos illisitos sin munchas vezes tener el koraje de infrinyir el dogma prinsipal.
De esta manera, en la Afrika, miles i miles de ombres, mujeres i ninyos profundamente atados a la relijyon Kristyana (la mas parte de un nivel kultural insufizyente) ke mueren aktualmente al nombre de un presepto relijyozo imperyozo, puedran enfin ser salvados.
Es ke, en su sagasidad de shefe espiritual de una populasyon eterojena, el Papa tomo enfin konsensya de la nesesidad absoluta de kumplir el esforso ke le inkumbe imperativamente de liberar la konsensya de una populasyon ke se topa debasho su influensa, del terrivle espanto de kometer un pekado imperdonavle kontra su Fey en vyolando uno de los prinsipales preseptos relijyozos?
Es kaji syempre en los momentos de grandes trajedias, ke espunta en la profundura de muestra konsensya, la vizyon de una mueva verdad , superyor lo mas del tyempo a lo ke era la presedente.
Ansi, esta desizyon ainda muy ezitante ke vyene de tomar el Papa Benedictus XVI puedra ser una viktorya de la parte de humanizmo ke deve kontener kualkyer sistema espiritual, sovre la rijidez del dogma estatiko en la permanensya de su immobilidad.
Eske eya va tener una kualkyer influensa sovre las otras kreensas Monoteistas a las kualas ninguno asta agora tuvo la ozadia de tokar?
Por seguro ke munchos dogmas delantre los kualos kontinuamos syempre a enkorvarmos sin por esto entenderlos kompletamente, tuvyeron sus momento de grande oportunidad i de klaredad en el pasado, en kontekstos historikos propisyos a sus desvelopamyento. Ma la mas parte del tyempo eyos no fueron progresivamente adaptados a la evolusyon del mundo en su movimyento insesante.
Esta desizyon del papa, aunke muy limitada, es komo una minuskula avyertura, mizmo un chiko paso verso una mueva konsepsyon de la espiritualidad dominada prinsipalmente por la “Etika” i el respekto absoluto de la vida umana.
