Uno de mis amigos, grande amigo tambyen de la gazeta ŞALOM me remetyo un artikolo de la politisyana i djornalista “Pilar Rahola” profundamente atada a las valores umanitaryas del verdadero Sosyalizmo, en su real dimensyon i partikularmente en su real sinyifikasyon.
No es un sekreto para ninguno ke la mas parte del tyempo los sosyalistos i komunistos de muestra epoka sostyenen otomatikamente el “Kavzo Palestinyano” sin mizmo tomar la pena de analizar ni djuzgar, estimulados al pareser por un djenero de reflekso de Pavlov.
Verdadera aktivista sosyalista, Pilar Rahola mos da una otra vizyon de la ideolojia otentika a la kuala eya apartyene, la verdadera vizyon de lo ke es realmente el Sosyalizmo, doktrina orijinalmente empapada de esprito de djustisya i igualidad, de lucha por el respekto de los derechos fundamentales de kada individuo de ke klasa sosyal o kual puevlo ke sea. Sus artikolos son publikados en Espanya ansi ke en los mas importantes diaryos de la Amerika del Sud).
La eskrita ke mi amigo me transmetyo es intitulada:
“Mizmo si el mundo no esta de akordo, el kombate de Israel es el kombate del Mundo”
lo ke me pusha a transmeter, a mi torno, unos kuantos pasajes del dicho artikolo a los lektores de muestro semanal.
“Deke no vemos en Londra, Paris o Barselona, manifestasyones kontra las varyas diktaturas del mundo? manifestasyones kontra la diktatura de la Birmania? manifestasyones kontra la esklavitud de las mujeres ke biven en algunos payizes, sin ninguna proteksyon legal? manifestasyones kontra la utilizasyon de ninyos komo bombas umanas?
Deke no ay ningun leadership para sostener las viktimas de la diktatura en el Sudan? Deke munchas vezes no ay la mas chika kritika kontra las atrosidades del terrorizmo kontra Israel? Deke munchos sosyalistos aktuales no defenden (kon la mizma fervor) “el derecho a la egzistensya” de Israel?
I por terminar, la kestyon prinsipal: Deke el sosyalizmo Evropeo aktual se obstina a kritikar los Estados Unidos i Israel i no las mas terrivles diktaturas del mundo? Ningun sosyalisto se preokupo realmente kuando el Hamas destruyo la libertad Palestinyana? El konsepto de la libertad Palestinyana fue utilizado solo komo argumento kontra la revendikasyon de seguridad de Israel.
De mezmo la Prensa İnternasyonal no enderecha las kozas, eya no informa, eya aze un lavoro de propaganda i munchas vezes kuando se trata de eskrivir sovre Israel, eya se olvida las reglas de la deontolojia profesyonal...”
Devo konfesar ke este artikolo de Pilar Rahola me impresyono muncho i fue (en el kaos ande paresemos undirmos desde unos kuantos anyos) komo una chika posivilidad de esperansa. Topi en el, la verdadera sinyifikasyon del “Sosyalizmo” un movimyento sosyo-poplitiko del kual persivimos los premisyos de universalizmo i umanizmo en varios pasajes de la Biblia.
