La opinyon publika es puedeser el elemento sosyal el mas instable ke puede egzistir, eya es syempre sometida a faktores imprevizivles i nunka igual a eya mizma.
Fue ansi del prezidente Barack Obama i de todos sus esforsos para una Amerika mas humana i mas avyerta al resto del mundo. La maraviyoza reforma de la salud ke asegura kudyos medikales a serka 48 milyones de desmazalados, aze en este momento, paradoksalmente, el objeto de varias kritikas muy amargas.
Ay dos anyos de esto, era el entuzyasmo por un ombre diferente de los otros, remarkavle grasyas a su enerjia i la profundura de su pensamyento, konsyente de los multiples defektos de un puevlo ke se kijo syempre una Super Potensya invensivle. Ay de esto dos anyos, era tambyen, en una grande partida del mundo, la enorme admirasyon por este mizmo puevlo ke avia vensido sus prejuisyos rasyales.
I Oy le reproshan de no aver tenido palavra konsernando el problema del “dezempleo” (shomaje) sin a ningun momento tomar en konsiderasyon el impakto dezastrozo de la grande kriza ekonomika ke se abatyo sovre el mundo oksidental.
En el ultimo artikolo de Bernard Henri Levy en la revista “Le Point” de la semana pasada, este autor dize:
“No se puede pretender ke la politika ekonomika de Obama kreo el “dezempleo” kuando todas las investigasyones seryozas (echas mizmo por pro-republikanos komo Mark Zandi et Alan Blinder) dizen ke eya kreo kaji 3 milyones de empyegos muevos.
De mezmo no se puede konsiderar un prezidente elijido ay 2 anyos, responsavle de la ruina de la Amerika ni de la kaji destruksyon de sus infrastrukturas o del deskaimyento de su sistema edukativo, dekadensyas ke avian empesado muncho antes ke el no tome el poder.”
Tyene razon BHL, la kritika enverso una persona en estado de difikultad es tan indjusta i desgrasyadamente tan fasil.
