El dia de Limmud devino mas ke un simple akontesimyento sosyal, kaji un djenero de ritual ke ekspresa de la parte de una grande parte de muestra komunidad un fuerte interes por varyos sujetos intelektuales i konfirma partikularmente la valor de una manseves ke desde unos kuantos anyos se manifesta no solo en el kampo ekonomiko ma tambyen en el espasyo kultural, lo ke realmente realsa el nivel de muestra kolektividad.
La rikeza ansi ke la diversidad del programa i sovre todo la kualidad de los ke tomaron la palavra son la prova de la enorme madurez de esprito del komite organizador ke merese reales felisitasyones.
Nombres prestijyozos de la prensa de muestra sivdad ansi ke de Ankara, profesores de Universidad Turkos komo estranjeros venidos de lugares diferentes, myembros de muestro sentro relijyozo enkavesado por el Gran-Rabino Rav Isak Haleva, ansi ke byen konosidos oradores de muestra kolektividad partisiparon al prestijyo de este dia dedikado a la kultura kon sus sujetos de konferensya de aktualidad komo tambyen historikos, los debates despues kada avla i los atelyes de estudyo ets.. ets..
Personalmente, por razon de salud i de edad, no pude asistir ke solo a dos konferensyas, dos sujetos de un grande interes para mi. La primera prestijyoza kon sus kuatro partisipantes: los byen konosidos gazeteros “Aslı Aydıntaşbaş”, “Sedat Ergin”, Semih Dündar İdiz”, “Taha Akyol” i komo moderador el direktor del Şalom İvo Molinas ke konduzyo el debate kon brio i en mizmo tyempo kon una grande profundura de refleksyon.
El sujet era de primera aktualidad para mozotros djudyos de Turkia “Türkiye- Israel ilişkileri” las relasyones entre la Turkia i Israel.La segunda konferansya (tambyen muy interesante para mi) ke tuve el plazer de segir, entitolada “Ortaçağda 8 ve 12 Yüzyılar arası, Yahudi ve Islam Kültürlerinin Birbirlerinin etkisi” fue echa por el Dochent Dr. Kürşat Demirci. El sujeto era situado entre el ochen i dodjen siglo, la epoka bendicha ande savyos muzulmanos lavoraron mano kon mano kon savyos djudyos, la inter-aksyon i la influensa de los unos sovre los otros, entre los kualos se topava rasyonalistos komo Averroes i Maimonides debasho la influensa aristotelisyana, i otros debasho la platonisyana.
Fue realmente un dia konsakrado a la kultura i a la bushkida de la amistad.
