El elemento el mas karakteristiko del dyezen mez de este anyo, fue “un soplo de negativizmo i de derrokio kaji jeneral”, partikularmente enverso las populasyones las mas vulneravles, lo ke inevitavlemente pusha la persona no solo al pesimizmo ma tambyen a un djenero de dubyo ... dubyo de la djustisya humana komo tambyen de la djustisya selesta...
Mizmo las intemperias atmosferikas paresen aver eskojido partikularmente los lugares ande el puevlo es el mas flako, el mas desmamparado i manko pronto a pueder kombatir... kortejos de desgrasyas, terremotos, epidemias mortales, mizerya endemika, lagrimas... i syempre fidel a eya mizma, kaji ineluktavle, “la ambrera” aspera kon persistensya a sus puerta.
Malorozamente, lado kon lado kon estas desgrasyas, una apatia al pareser konjenital, una absensya (a syertos momentos kompleta) de verdadero esforso a kombatir de la parte del puevlo el mizmo ... i, adjuntado a esto todo un insesante superpuevlamyento ke no permete la realizasyon de ningun proyeto de ayudo sosyal.
Es ke la situasyon de la populasyon de los payizes desvelopados es de leshos mijor?... por seguro manko trajika, ma se ve syempre enormes diferensyas de kondisyon de vida entre la klasa rika i la modesta, una frenezia jeneral de lukso ke parese pushar munchos mansevos a kerer bivir a un tempo muncho mas alto ke sus medyos materyeles, lo ke los insita a kometer envezes aktos illejitimos i illegales.
En Fransya, en las kayes, una populasyon en estado de deliryo paranoyak protesto i protesta ainda (a syertos momentos de una manera histerika) kontra una reforma ke se impoza ovligatoryamente a la sigida de un endevdamyent kreshente del budjeto del payis, endevdamyento ke data de vente o trenta anyos antes i riska aktualmente de ayegar a un estado de fayita kompleta.
Asta agora (ahuera chikas tentativas sin rezultado) ningun governo presedente tuvo el koraje de afrontar “la ira i sanya” del puevlo opozado a kualkyer trokamyento, el governo aktual lo izo al risko de renderse antipatiko por syempre.
I oy, ombres i mujeres ansi ke institusyones sindikales opozan syempre un refuzo sistematiko a un muevo proyekto de ley ke fue akseptado demokratikamente por el Parlamento i el Senato…
Estudyantes i mizmo eskolaryos a penas konsyentes de la importansa del teksto, kontinuan a protestar, mesklados a “derrokadores” ke toman plazer a romper i destruir todo lo ke se topa sovre sus pasaje.
En los Estados Unidos, una kriza ekonomika persistente komplikada por los gastes faraminozos de armamyento ke egzijo la partisipasyon a dos gerras sin solusyon posivle, erredadas de los governos presedentes, no permete la kompleta realizasyon de ningun proyekto pozitivo i renforsa ansi la deskontentes del puevlo, ansi ke la pozisyon del partido adverso.
Por kontra, en la İngleterra, mezuras ekonomikas osteras fueron tomadas kel puevlo aksepto kon kalmo.
En la Almanya, mas grave puede ser, ma sin ninguna reaksyon klaramente manifestada, las palavras de Angela Merkel ke deklaro avyertamente la fayita del esforso de “multikulturalizmo” kon los imigrantes estranjeros instalados desde unos kuantos anyos en el payis.
En el Oriente Medyo, mizmas amenazas, mizmas palavras destruktoras de la parte del prezidente Iranyano i de sus akolitos enverso Israel.
Ningun progreso en el proyekto de negosyasyones entre el Estado Palestinyano i el Djudyo, negosyasyones ke no ayegaran a nada, tanto ke kada uno kedara enfohado en su sola voluntad, komo un nyudo de aspirasyones inkompativles las unas kon las otras. Las amenasas de destruksyon de la parte de syertos payizes vezinos puchan kontinualmente Israel a kontinuar una kolonizasyon illejitima sovre una tyerra ke aze el objekto de una de las kestyones diskutidas.
En desparte de esto, una mueva kondisyon absolutamente lejitima eya i mizmo imperativamente indispensavle, es formulada de la parte de los muestros: “Ser nombrado i konsiderado komo un Estado Djudyo Israelyano”.
