Myerkoles el 25 Oktobre, dia de rememorasyon, de dolor i de lagrimas, dia ke ningun djudyo de muestro payis tyene el derecho de olvidar.
Unos kuantos anyos antes, terroristos venidos no se save prechizamente de ande, monstres kreados debasho formas humanas, mankos de konsensya komo de sentimyento, se atakaron de una manera salvaje, sin mizmo un kualkyer profito ni motivo personal, a mujeres, ombres i ninyos para eyos deskonosidos, komo una fatalidad syega ke se abatyo en supito en la serenidad mizma de dos espasyos de orasyon: el Kaal Neve Şalom i el Kaal de Şişli.
No fueron las viktimas eyas mizmas, ke eran vizadas, ma el Djudaizmo en uno de sus momentos de espiritualidad. Es “el konsepto djudyo de Dyo” ke eyos kijeron destruir.
