Alüminyum Hurda Geri Dönüşüm

Ayer i oy Nishantash - 2

Ayer i oy Nishantash - 2

Mi primer enkontro kon este sentro... Biviyamos en Galata i meldando en eskola del Estado teniya una amigita muzulmana Ülkü, de famiya bastante rika. Anyos de gerra, mi padre leshos de kaza, azyendo su servisyo militar (20 Klasas) i visto mi edad, no era yo permetida de estar en las kayes despues la eskola. Mi madre era muy rigoroza sovre esto. Kon el retorno de mi papa, la interdiksyon se aflosho un poko...

A kondisyon de traerme la dada de Ülkü a kaza, me permetyeron de irme ande mi amigita, a Boton Han, aktualmente Doğan Apt. El anyo final de la eskola primera, Ülkü se fueron morar a Nishantash. Por evitarle difikultades de adaptasyon no trokaron de eskola. Fue ansi ke un  Alhad el shofor suyos,me tomo de Galata prometyendo a mi padre de traerme  oras de tadre. La fragua ande moravan, el edifisyo enfrente el parko de Harbiye, oy en diya egziste. Debasho es el famozo restorante “Yekta”. Ansi vide por primera vez en el 44 el sentro ande bivo agora desde 57 anyos. Estas vijitas se repetaron unas kuantas vezes ma mi konosensya de Nishantash se limito kon este lugar.

Avril 1945 nasyo mi ermaniko chiko en el Espital Amerikano. Akel tyempo no permetiyan mas de dos vijitadores en la kamareta de las paridas o hazinos. De sorte ke mi padre, profitando de la prezensa de  algunos al lado de mi madre, me tomava de la mano i una vez o dos, izimos tornos a traverso Nishantash o en los tepes detras del Ospital. Ansi, se  enrejistro en mi  memorya de 12 anyos, imajes del Nishantash de akeya epoka ... Oy, enfrente la vizyon aktuala del Sentro, no me puedo impedir de pensar ande se fueron tantos edifisyos en tavla, tantas guertas??... 

Tornaremos a la Istorya. Komo lo dishimos en el primer teksto, empesijo del 19.Siglo aki era tepes, bostanes. Sultan Abdulhamit II (1876-1909) instalandose al Palasyo de Yıldız, kijo a sus ayudantes serka de el. Fue alora ke los bostanes ampesaron a ser ramplasados por abitasyones rikas, koshkes i manyifikos konakes de tavla, aryento de guertas.

Uno de estos era el “Süreyya Paşa Konağı”, vyendose en la fotografiya. Aki es el sentro mizmo, komo se dize komunamente, el “göbek” de Nishantash. En este lugar oy se topan los apartamentos famozos Marmara, Uğur, Çiftçiler ets... Enfrente se topa el “Vali Konağı”,  Rezidensya del Governor de Estambol.

Nishantash syempre tuvo la nombradiya de ser el “Sentro de los Pashas”. Fue el distrikto rezidansyel de los Pashas Otomanos, lugar preferido de notavles muzulmanos en los ultimos siglos del Imperyo i kontinuo a ser el distrikto “elit” de la sivdad. Munchos afirman ke la prezensya de Teshvikiye Camii fondada en 1853 por Sultan Abdulmecit, fue una de las razones de esta preferensya. Oy mizmo, un buen observador puede remarkar en Teshvikiye, Machka o a la abashada de Topağacı, en Ihlamur, egzempyos maraviyozoz de arkitektura. Fraguas kaji antiguas ke malorozamente se estan pyedrendo entre los imobles modernos.

Nishantash, oy en diya konserva su fama de sentro rezidansyel. Al lado de esto ay unos 8-10 anyos se transformo tambien en un sentro gastronomik kon sus restoranes i kafés. I agora, de unos, kuantos anyos para aki, adjustando a esta fama, esta en el kamino de ser un nombre en la “Moda Internasyonal”. 

Es ke muestro distrikto se izo “Champs-Elysées?, asigun lo aviya previsto el Sr. Sarıgül? Vyendo los magazenes kon las markas lusyozas de New-York  o Milano, los cafés en los trotuares i espesyalmente rememorando las iluminasyones del 31 Desembre, esto deshando a los lektores la repuesta de esta pregunta... 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın