Un rezin-nasido nombrado “Umut”

Klara PERAHYA Judeo-Espanyol
16 Şubat 2011 Çarşamba

“Umut”, un nombre en perfekta adekuasyon kon la situasyon ande el ninyo nasyo, portador de esperansa a una famiya Turka en estado de dezespero , instalada en Fransya, kon dos ninyos aflijidos todos los dos de un mal jenetiko asta agora konsiderado komo inkuravle.

İ oy para los paryentes desmamparados “una esperansa” kaji “una sertitud” vyene arrelumbrar lo ke era el kampo estrecho de una vida de amargura; un muevo ninyo enteramente sano vyene de naser, no solo sin la mas chika trasa del maldicho mal, ma tambyen portador de una enorme esperansa de kurasyon para su ermana grande, grasyas a una transplantasyon de selulas sanas i kurativas ke seran prelevadas no del puerpo del “rezin nasido” ma del kordon umbilikal, el kual durante el periodo del prenyado ato el ”fœtus” a la plasenta maternal.

La Syensya kon una grande Mayuskula krea aktualmente esperansas mirakulozas para kavzos ke paresian irrekuperavles, viktorya ke no se puede nyegar kontra una fatalidad, asta poko antes, syega i sodra.

  Por seguro ke la vijilensya deve ser muy grande en kualkyer manipulasyon jenetika i es la razon por lakuala la “bioethika” fue kreada i ansi semblables problemas son estudyados prealavlemente de una manera intransijente afin de evitar el mas chiko abuzo suseptible de dar lugar a una alterasyon del potensyal jenetiko humano … lo ke no es ni de serka ni de leshos el kavzo de la operasyon en kestyon ke es echa en toda legalidad por eminentes profesores de la medikeria.

Este sujeto fue djustamente diskutido en uno de los debates ke tuve la okazyon de segir en la televizyon franseza; debate entre: de una parte “dos syentifikos- el jinekologo ke resivyo el ninyo i el selebre jenetisyano Axel Khan” i de la otra parte “dos partizanos de una bio-ethika muy severa”.

Uno de los partisipantes del segundo grupo, inkyeto probablemente de la fuersa aktual de la Syensya, demando al jinekologo kuantos ambriones fueron testados asta topar dos de entre eyos enteramente sanos i  kompatibles kon el potensyal jenetiko de la persona ke los resivera, en este kavzo, la ermana grande a la kuala seran implantadas las selulas salvatrisas. El shifro enunsyado fue bastante alto.

Entyendo byen una semejante kestyon  … es el derecho i mizmo el rolo de kualkyer individuo konsernado realmente por la “Bioethika” de syempre ser de una estrikta vijilensya.

Ma uvo una otra remarka, esta vez de la parte de la segunda partisipante del mizmo ekipo, ke disho eya: “Por seguro ke es una ermoza koza kel nasimyento de este ninyo sea una posivilidad de sanar su ermana grande, ma es ke esto no puedra tambyen ser mas tadre un golpe a la dinyidad del muevo nasido ke un dia se puedra demandar: “en el fondo, deke me metyeron al mundo? a la sigida de un akto de amor? o byen por simple menester?”.

 Devo konfesar ke esta remarka, yo no la entendi …

Primo) “ser voluntaryamente o involuntaryamente la kavza de una salvasyon” no puede konstituir un golpe a la dinyidad de kualkyer persona , esto realsa su individualidad i en ningun kavzo la arrebasha…

Segundo) komo dicho mas arriva, las selulas ke serviran a kurar la ermana aflijida del terrivle mal, no fueron prelevadas del puerpo del rezin nasido, ma ekskluzivamente del kordon umbilikal.

No ay dubyo ke UMUT sera doblemente amado no solo en su famiya, ma tambyen en su entorno. Dar o mentener la vida es el mas grande dever de todo modo de kriansa i mizmo la mas grande glorya ke fue dada al ser humano.