Djuevez la tadre el 27 Enero

Klara PERAHYA Judeo-Espanyol
2 Şubat 2011 Çarşamba

La semana pasada, djuevez el 27 del mez de Enero, dia anniversaryo de la liberasyon del kampo de la muerte “Auschwitz- Birkenau” dezinyado por la Asamblea Jeneral de las Nasyones “dia de la Shoha”, una grandioza seremonia ofisyal fue organizada en la Sinagoga Neveşalom, en memorya de las viktimas eksterminadas de una manera inhumana por la barbaria nazi. Seremonia a la kuala asistyeron el Governador de la sivdad de Estambol el Vali Hüseyin Avni Mutlu, el Shefe de la Munisipalidad Kadir Topbaş, el Delegado del Ministeryo de los Echos Eksteryores el embashador Ertan Tezgör, el Hahambaşı de Türkiye Isak Haleva,el prezidente de la komunidad Djudia Sami Herman ansi ke numerozos notables i myembros de muestro payis i de muestra Komunidad, i tambyen dos supervivyentes de la Shoah reskapados de los kampos de la muerte grasyas a la intervensyon de la Turkia: Lazar Ruso i Albert Saul.

El Vali de Estambol Hüseyin Avni Mutlu i el Hahambaşı İsak Haleva asendyeron kandelas en memorya de las viktimas.

La emosyon era grande en la grande Kehila, dia de dolyo, dia de komemorasyon i de akodro, i tambyen dia de solidaridad.

Antes ke empese la seremonia, fue avyerta la ekspozisyon de fotografias de Primo Levi, intitulada “Bunlar da mı insan” İ fue mostrado el dokumento de la liberasyon de Auschwitz.

 Ertan Tezgör delegado del Ministeryo de los echos eksteryores, avlo sovre la intervensyon de la Turkia para salvar los djudyos orijinaryos de muestro payis ansi ke numerozos syentifikos de konfesyon djudia, salvasyon de lakuala se topavan prezentes dos testigos “Lazar Ruso” i “ Albert Saul”.

El Governador de Estambol Hüseyin Avni Mutlu se refero a la byenkerensya, la toleransa i la amistad ke egzistyo en muestra sivdad i ke syempre egzistera.

De su parte el Prezidente de muestra komunidad Sami Herman insistyo sovre el tema del jenosidyo de milyones de inosentes, desgrasya ke fue el punto kulminante de un espirito de salvajeria ke kijo destruir i nyegar las verdaderas valores de la humanidad.

Munchas otras personas tomaron la palavra, entre otras Suzi Sidi ke kon su elokuensa natural avlo largamente de este terrivle akontesimyento,el kual kedara syempre komo un punto dolorozo en la Historya de la Humanidad.

Djueves el 27 Enero 2011 fue un dia dedikado a la Shoha ansi ke implisitamente a la memorya de todas las viktimas (djudias i tambyen no-djudias) eksterminadas sin razon ni piadad ... Djueve el 27 Enero fue igualmente un dia dedikado a la importansa de la amistad i de la solidaridad humana.