Esta kestyon es formulada por Matt Friedman en el kotidyano Jerusalem Post.
Eya mos dize ke los haredim (minoridad ultra relijyoza djudia) azen mas ninyos ke la normal, ansi en unos kuantos anyos, eyos puedran ganar una syerta influensa.
Esto dicho, se deve tambyen remarkar ke paralelmente a esto, sus komporto empeso a trokar poko a poko.
Segun un raporto de la Universidad de Haifa 30% de los muevos nasidos djudyos en Israel son Haredim, ansi la proporsyon de Djudyos Ultra-ortodoksos de la populasyon pasara en 2025 de 9% a 15%.
El efekto de este kresimyento disproporsyonado, se azera realmente sentir kuando la mueva jenerasyon alkansara la edad de azer el “Servisyo militar” i de ir a lavorar.
Aktualmente, las relasyones entre los Haredim i los otros Israelyanos no son nunka muy simples. Los ultra-relijyozos son munchas vezes akulpados de preferar el estudyo relijyozo al lavoro i de arrondjar la sosyedad moderna todo en bivyendo en su seno.
Oy en dia, ay 700.000 Haredim en Israel. Los 60% biven debasho del umbral de la provedad. La mitad de entre eyos no lavoran, munchos estudyan la Torah de la manyana asta la tadre i resiven ayudo materyal del governo, lo ke amenaza ekonomikamente el futuro del payis i irrita la mayoria laika.
De otra parte, el Jeneral Gabi Ashkenazi kritiko kon severidad los Israelyanos ke no kumplen sus dever militar... sinyos de evolusyon a este sujeto se estan poko a poko azyendosen sentir... Desde un syerto tyempo, el shifro de haredim en la armada paso del shifro 0 asta unos kuantos milles.
La Armada aparejo programas adekuados a los prinsipyos de los ultra-ortodoksos, programas ke permeten a los ombres haredim de servir en un espasyo unikamente maskulino i de mantenersen de produktos konformes a sus reglas alimentaryas.
De mezmo en el espasyo de 10 anyos el shifro de haredim en los programas de formasyon profesyonal paso de 1000 a 6.500, i la kuantidad de ombres ultra-ortodoksos ke tyenen un empyego pujo de 8% en el espasyo de 8 anyos.
Sin rezolver enteramente este grave problema en Israel, se ve en todo kavzo komo un empesijo de adelantamyento...Nombrozos analistos i komentadores afirman ke munchos haredim mansevos no keren mas bivir en la soledad i la provedad.
Por seguro esto se realizara progresivamente, de anyo en anyo un mas grande shifro de ultra ortodokses van a entrar en la armada i partikularmente en la esfera del lavoro... lo ke sinyifikara realmente empesar a trokar..
