Batya Natan

Un CHİKO MOABET de FIN de ANYO

Un CHİKO MOABET de FIN de ANYO

Kuando me asenti para ampesar este teksto, kedi un momento, pensando a kualo puedo eskrivir. Tuve komo el sentimiento ke fin de anyo esta un poko mas difisil de topar los byervos djustos para este moabet. Seriya una syerta melakoliya? O, la impresyon de realizar ke otrun anyo se esta eskapando, aparejandose a entrar en las ojas de la Istorya. O ay safek ke mos rendimos kuento ke otrun anyo paso i ke estos 365 diyas no mos abastaron a kompletar muestros proyektos, a realizar muestras esperansas, muestras aspirasyones. Ay probabilidades ke izimos promesas i no tuvimos tyempo de tenerlas...

Es lo ke es, lo mijor de azer es de no atristarmos muncho en pensando a las oportunidades ke deshimos pasar, los eskopos ke no alkansimos o los suetos non realizados. A la kontra, malgrado las kozas ke no se kumplieron, puedemos alegrarmos, ser kontentes kon lo ke reushimos, kon muestras muevas konosensyas i ganansyas. Aki, keridos lektores, el byervo ganansya no lo emplei en tal ke profito materyal. Kije azer aluzyon a muestras ganansyas moral, komo ayudar al menesterozo, dar rekonforto moral a un amigo malorozo ets... Naturalmente, si uvo un profito materyal en el korso de la anyada i esto mos rende orozos, deke no??!!..

A mi opinyon, no ay dingun sensyo, dingun menester de traermos endjuntos al muevo anyo la deziluzyon de lo ke no pudimos azer o el regreto de lo ke no reushimos. Siguro es muy fasil de dar konsejos. En realidad no es konsejo ke esto dando. En una manera es de mi para mi ke me esto afalagando.  En todo kavzo esto konvensida ke el umano syempre tuvo en su natura un syerto optimismo. Portanto, no mos puedemos impedir de vez en kuando, de dizir “keshki”, “si saviya”... Byervizikos ke son la pura ekspresyon de los regretos. No permeteremos a estos sentimientos negativos de amenguar el plazer de entrar a un muevo anyo. Es komo avrir una oja blanka i ampesar kon rezolusyon . Es egzaktamente lo ke penso azer yo.

Esto muy sigura ke de agora, para el anyo ke esta viniendo ya mos fiksimos muevos eskopos, muevos proyektos al lado de los ke kedaron medyos entervalo del anyo ke esta terminando. Keridos amigos, el anyo esta eskapando..  Bueno no es la fin del mundo! No vos olvidesh, si el 2010 eskapo, muestras esperansas nunka van a eskapar. Sueto a todos los amigos, a todos los lektores ke konosko o no konosko, ke el anyo 2011 seya para eyos, anyo de sanedad, de prosperidad i felisidad. Sueto ke seya anyo de paz i repozo en el mundo entero. Byenvenida al muevo anyo...     

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
505