Batya Natan

“La Kula” “Proyekto Galata” UÖML

“La Kula” “Proyekto Galata” UÖML

En la anyada eskolar 2009-2010 elevos de la Eskola Djudia izyeron diferentes aktividades i prepararon diversos lavoros. Entre eyos, un grupo  tomando instruksyon de “Filmo Dokumanter”, realizo un kurto metraje sovre Galata en jeneral, en el kuadro de “Estambol Kapitala Kultural 2010”. Vyernez 18 Junio, myentres las seremoniyas de fin de anyo se izo la primera projeksyon de este filmo intitulado “La Kula”...  Deke la Kula i no Galata?...

“...Es el Sentro ande pasi mi chikez en el seno de una famiya unida i kerensyoza... Una chikez oroza malgrado las estrechuras i reselos de la gerra, kon mis avuelos, mi famiya, mis amigas... Es, kon lo bueno i lo negro de antes 70 anyos ande me engrandesi i ke syempre yami LA KULA...”

En el roportaje ke ize ampesi este modo a kontar. Estos mizmos byervos  fueron empleados i kon la boz miya en el presipyo del filmo... En el fon, imajes del distrikto, en mayoriya tomadas de las arshivas del Sr. Ara Güler.Tuve el plazer de partisipar al lavoro de los mansevos, de dar una chika kontribusyon kon mis rekuerdos. De sorte ke, apenas eskapi de eksprimir mis sentimientos, dechidaron a la unanimidad de dar al filmo el nombre La Kula. Ansi fui la madrina!! (isim annesi) del filmo.

El grupo ampeso el aprentisaje i aparejos del filmo desde la fin del 2009. Los estamos vyendo kon anorak, chapeyo i kashkoles, bevyendo “salep” en la Plasa de la Torre, o en las kalejas, azyendo roportajes kon los esnafes. El patron del “kafiko de la Kula” de mi manseves esta kontando las relasyones amikal ke egzistiya entre los djudios, gregos i muzulmanes. Otro vyejo esnaf aki desde el 60, en la koshe de la kaleja Serdar-ı Ekrem (exYazıcı Sokak), disho ke esta bushkando kon nostaljiya el ansyano Galata... Estos propozitos ya los aviya sintido i yo myentres mis presedentes tornos de Galata... Par kontra, ay otros komo la famoza modista Bahar Korçan ke transfero de Nishantash no solo su atelye i “boutique”, tambien su domisilio al nostaljiko Doğan Apt. de Yazıcı...

Los elevos izyeron roportaje el Sr. Mete Göktuğ, arkitekto i fondador de la “Asosyasyon Galata”. Bive en la fragua echa en 1904 komo “Polisiya Ingleza”i aktualmente “Galata House”. Intelektual, profesyonal, esta dando informasyones reelmente enteresantes sovre Galata, porto importante en su Historia... Tambien, komo oy en diya se ve trasas de la Era Medieval ets...

A una etapa del proyekto, los elevos, giados por la Maestra Dilek İçinsel, estan pensando ke deven en una manera “koronar” sus lavoros kon mas elementos. Kon testimonios de personas de una syerta edad, ke bivyoron aki i konosen bien Galata. İzyeron sondajes i komo referensya! del pasado arrivaron a mi nombre, me bushkaron. Fue ansi ke en Avril, ampesi a tomar parte en el proyekto. Kon un grupo de  elevos lavorimos oras en las salas de UÖML... No me pozaron munchas kestyones, preferando filmar i gravar lo ke estava kontando yo sovre el sentro i la kaza ke bivi, mis keridos djenitores, mis estudyos, mis kompanyeras de eskola ets..

Savyendo ke eskrivo al “Şalom” kijeron otro diya, kontinuar a filmarme en esta atmosfera. Era myerkoles, 5 Mayo, diya de aparisyon de “El Amaneser” ande eskrivi por el “Diya de la Madre”, la poezia a mi madre i debasho su fotografia. No remarki ke la tomaron a la kamera. Fue reelmente grande emosyon kuando vide la foto de mi mama en el ekran. Me izyeron otruna sorpreza en filmando de diversas fachas Saffet Bey Apt. ande bivi tantos anyos. Me arregalaron el D.V.D del filmo, presyozo rekuerdo para mis inyetos.

Komo estash vyendo keridos lektores, ser aedada i ansyana moradera de la Kula es al pareser un doble privilejyo, ke dizish!?

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
590