“Este teksto es parte de mi seriya ke ampesi antes unos, kuantos mezes sovre la”Vida Profesyonal-Mundo del Lavoro”. Mis linyas tratan de una jeneralidad i no kontienen kualkyera aluzyon a dingunos. Es, komo lo uzo syempre un rezultado de mis observasyones, de lo ke oygo i meldo...

" />
Alüminyum Hurda Geri Dönüşüm

Lavorar kon personas difisil

“Este teksto es parte de mi seriya ke ampesi antes unos, kuantos mezes sovre la”Vida Profesyonal-Mundo del Lavoro”. Mis linyas tratan de una jeneralidad i no kontienen kualkyera aluzyon a dingunos. Es, komo lo uzo syempre un rezultado de mis observasyones, de lo ke oygo i meldo...

En realidad, no solo en el lavoro, ma en todas las sirkumstensyas de la vida es bastante difisil de komunikar kon talas personas. Ke tipos entran a la kategoriya “difisil”? Los primeros ke me vyenen al tino son los ke se keshan de todo, los “tiranes” (zorba), los ke se ensanyan (öfkelenmek) por un si, por un no, los ke se opozan a todo modo de idea, sin djuzgar o sin konsiderar los motivos, los ke pretenden saver todo “eskupesehel” (ukala) ets..  Aparte ke es kaji tortura (işkence) lavorar kon eyos, en vezes pueden kavzar mizmo endirektamente muestra desfecha.

Los espesyalistos dizen ke es kaji imposivle pueder trokar el komporto de estas personas. Portanto, se puede adoptar una estratejiya para parvenir a somportarlos. Komo estableser (tesis etmek) una komunikasyon (iletişim) kon una persona ke kontinualmente pretende tener razon, se opoza a todo, se kesha del echo, de los kolegos, del friyo o de la kalor!, en kurto de todo??... Estos tipos syempre de una manera reushen a topar faltas, ma es kuryozo! no reushen nunka a solver los problemas!!... No son de akordo kon dingunos... 

En kada etapa de la vida mos puedemos topar lado kon lado, kon personas difisil de komunikar. Ma, kuando se trata de la Vida Profesyonal, la kestyon deviene un problema importante. Es klaro ke kada malentendimiento, kada dezavenimiento va tener un efekto negativo sovre muestra reushita, par konsekuensa, sovre la “rentabilidad” (verimlilik) de la organizasyon tambien. La atmosfera de stres influensa negativamente el entorno, provoka mizmo sanya. I, kon una sanya mal kontrolada no se obtiene rezultados pozitivos.

Un estado semejante puede mizmo tener konsekuensas indeziravles.(arzu edilmeyen sonuçlar). Por egzempyo, komo la pyedrita del lavoro, del empyego ets.. Un espesyalisto esta dizyendo: “En todo modo de lugar puedesh enkontrar personas difisil. En muestra famiya, entre los amigos, i afilu mozotros puedemos ser difisil. Alora, kale pensar dos vezes i bien djuzgar. Naturalmente no dezeamos kolavorar kon talas personas. Ma, en kavzo ke tenemos la ovligasyon de kontinuar muestro kamino kon eyos, devemos ambezar i pratikar syertas reglas fundamental. Kijo dizir ke aravyarmos, inyervarmos no es una solusyon. A la kontra, topar un remedyo de kolavorar i ser produktivos malgrado todos los inkonvenientes de karakteres tan opozados...”

En vezes vos puedesh topar en kolavorasyon kon una persona pretendyendo “saver todo”!! Alora, lo ke tenesh de azer es profitar! de la okazyon en dandole una misyon difisil. Veremos komo va reushir. A lo menos por un syerto tyempo no le va salir la boz. Estad prontos a una sorpreza, ken save? Ay tambien probabilidades ke va reushir la misyon ke se enkargo...

Supozando ke estash enfrente de un kolavorador ke se ensanya muy presto, vozotros devesh konservar vuestro kalmo. No es fasil de luchar kontra la sanya ma, vuestra kalmeza puede darvos una superyoridad. Par kontra, si no reushitesh a  topar el kamino derecho de luchar kon una persona difisil, muy probavle ke no vash a tener repozo en la atmosfera profesyonal.

Se deve afirmar klaramente ke el derredor profesyonal, el mundo del lavoro kolektivo egzija ayudo, apoyo i akordo resiproko de todos los elementos. En kurto, una atmosfera amikal. Me parese ke no es yerrado ni “hanefud” de mi parte, dizir ke esta atmosfera kordial reelmente egziste en Muestra Gazeta Şalom. En kada vez ke ago una kurta vijita, seya muestra amiga Tilda Levi, seya las otras amigas me azen sentir esta kordialidad, malgrado muestra grande diferensya de edad... Lo ke me aze muncho plazer...

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın