Muestro grande amigo el Profesor Haim Vidal Sephiha me mando un e-mail konsernando el ultimo livro del filozofo i eskritor Fransez byen konosido “Regis Debray”.
El no paresia muy entuzyasto al sujeto de esta ovra intitulada “Lettre a un ami Israelien”. Personalmente, syendo ke no la meldi, no tengo el derecho ni la intensyon de avlar de su kontenido..
Ansi ke lo entendi, el livro en kestyon es bastante kritiko konsernando la politika aktual del governo Israelyano; por kontra (segun las chikas bushkidades ke ize individualmente en el internet) el eskritor “Regis Debray” no es en ningun kavzo antisemito, el tyene mizmo formulado apresyasyones por las grandes aksyones del Djudaizmo i su kontribusyon a la evolusyon de la sivilizasyon humana.
El livro en kestyon tyene por seguro la posivilidad de devenir un sukseso de libreria, el probavlemente kontyene verdades irrefutavles ke mos son dolorozas. Ma asta ke nivel un ajeno a Israel puede entender realmente la situasyon? Sovre ke argumentos repoza su severidad? Es ke el bivyo en sus karnes la tensyon nyervoza a la kuala son sometidos kontinualmente los moradores de este chiko payis?
Las espekulasyones intelektualas las mas sofistikadas no abastan syempre a pueder entender (en su integralidad absoluta) la verdadera dimensyon de un problema...
Komo lo dishe mas arriva, personalmente no vo avlar del kontenido de esta ovra ni de los divers komentaryos ke eya provoka i provokara, portanto la mizma kestyon ke syempre me vyene sin kedar al tino i me obseda de muevo: “Asta ande puede ir la libertad de djuzgamyento kuando se trata de kavzos ke no tuvimos la okazyon de konoser de muy serka?
Asta ande la libertad de ekspresar lo ke pensamos en bazandomos ekskluzivamente sovre muestras solas konviksyones, sin pasarlas por el sedaso de muestro esprito kritiko i sovre todo oto-tokritiko?
No mos olvidaremos ke munchas vezes semos giados (sin tener konsyensya de la koza) por fragmentos de vyejos prejuisyos inkrustados en muestra memorya.
Estos prejuisyos mos vyenen munchas vezes del tyempo leshano de muestros ansestros, de las sufriansas i umilyasyones ke eyos tuvyeron a soportar en sus kualidad de puevlo sin tyerra, i ke figuran en vyejos tekstos sin dubyo muy presyozos en el konteksto historiroko del tyempo ande fueron eskritos, ma sin ninguna relasyon kon muestra epoka.
Si... la libertad de refleksyon komo la libertad de ekspresyon son sakras... Eyas konfirman la evolusyon de la kriansa humana i mos azen sentir el immenso adelantamyento del ombre... ma a la sola kondisyon de no devenir eyas mizmas dogmas.
