Alüminyum Hurda Geri Dönüşüm

Kada edad tiene su ermozura...

Kada edad tiene su ermozura...

Tengo meldado un artikolo dizyendo, lo ke kavza la mas grande destruksyon al benadam, son los anyos ke pasan, la “Edad”. Siguro es un punto de vista ke respekto i no penso komentar. No ay dubyo ke en el korso de los anyos mos estamos desvelopando seya fizikamente, seya mentalmente. Mos estamos engrandesyendo i ambezandomos konosensyas importantes. Ma, paralelamente, el tyempo avagar, avagar esta azyendo su lavoro de destruksyon sovre el organizmo. I, malorozamente munchas vezes sovre las fonksyones del meoyo. Es una realidad ke no puedemos trokar.

Naturalmente no puedemos tambien, detener la kursa de los anyos. Portanto puedemos azer esforsos para konservar la sanedad del puerpo, i en syertos kavzos del meoyo. Kreo ke ya estamos de akordo: antes de todo la salud.  Un proverbo eskosezo dize: “Las personas pensan ke en bivyendo se envejesen. Ma, es en  NO bivyendo ke se azen vyejos..” Ay muncho de avlar sovre esta dicha i kitar unas, dos lisyones!!.

Envejeser, entrar en anyos, bivirlos ma ke manera? Travarmos a un kanton kon el preteksto “ya paso de mi, a esta edad kualo puedo azer?” Este preteksto yo no lo acheto de una persona en buena salud, komo razon de ser inaktivo!. Afilu un “hobby” es el bienvenido en los anyos maturos de retreta. Esta teza miya, kreevos keridos amigos, no tiene dingun raporto kon la edad. Del momento ke te konsideras komo aedado i no tienes dingun buto en la vida, ya sos aedado!.

Aktualmente, los mansevos, kero dizir muestros ijos, inyetos estan pudyendo alkansar a todo modo de informasyon grasyas a la teknolojiya moderna. A mi opinion, esto nunka sera igual a las eksperyensas ganadas en el korso de tantos anyos, a las lisyones ko tomamos de muestras faltas o yerros en kada etapa de la egzistensya. Djustamente una kantika ampesa ansi: “I know what it is to be young, but you don’t know what it is to be old.” (yo se lo ke es ser mansevo, ma tu no saves lo ke es ser aedado!). Fraza eksprimiendo un mundo...

Tuve munchas okazyones de abordar en mis tekstos la konsepsyon de ser “aedados”. Me parese, el anyo pasado eskrivi por la reushita de muestra amiga Dr.Beki Bardavid, reushita ke no fue sorpreza para mi. Ma, algunos fueron enkantados al grado de demandar, a esta edad, ande Beki topo la enerjiya i veluntad de estudyar. Komo lo savesh, se tratava de su “Teza de Doktora” ke fue akseptada. Esto kontinuando a pensar ke no ay edad para ampesar un lavoro, kompletarlo kon sukseso.

Un egzempyo bivo a mi argumento, es otruna amiga muestra, otra Beki... Kero eskrivir unos kuantos byervos sovre Beki L.Bahar, una de las mas produktivas eskrivanas de muestra Komunidad i de mi jenerasyon. Ultimamente publiko su muevo livro, “Bir Zamanlar Çıfıt Çarşısı” (Un tyempo el Ç.. Ç..). Ay un syerto tyempo ke mos konosemos kon Beki Bahar, ma a mi grande regreto no tenemos munchas okazyones o diremos, posivilidades de vermos muy frekuente.

La bushki kon telefon para felisitarla i izimos una larga konversasyon. En sus lavoros presedentes Beki ya aviya eskrito sovre los djudios de Ankara i Estambol. Esta vez, se aprovecho de lo kontavan sus djenitores, su esfuegra i de sus propios rekuerdos. Ansi, deskrivyo la vida sosyal de una epoka en Edirne, Bursa i Eskişehir. Deke espesyalmente estas tres sivdades? La repuesta la esta dando Beki: “Yo nasi en Estambol de madre Edirne’liya i padre Bursa’li. Me engrandesi en Ankara. Me kazi kon un mansevo teniendo raizes en Eskişehir...”

En felisitando Beki otruna vez, pensi si no seriya una buena idea de tresladar este livro al Judeo-Espanyol... Ke dizish? 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın