Mez de Mayo, mez de alegria, mez de esperansa

Klara PERAHYA Judeo-Espanyol
12 Mayıs 2010 Çarşamba

En estos dias del mez de Mayo, el enverano esta en muestra  puerte, klemente en su dulse kayentor, En kada kaleja i kaleja (en desparte de los ermozos “tezgyahes” de flores, de los kualos muestra amiga Coya Delevi mos avla kon tanto fervor)  vitrinas yenas de vestimyentas de kolores  a kolores... karas munchas vezes sonrientes, una ermoza manseves, vehemente en su avla i sus djestos...

I tambyen, personas mas aedadas, mizmo muy aedadas, fachas puede ser arrugadas ma en la ekspresyon el rekuerdo de todo lo ke eyas vyeron, todo lo ke konosyeron, todo lo ke bivyeron, rekuerdos mesklados  de un intenso dezeo de ainda bivir afin de mas ver, mas konoser, mas gozar.

I para realizar este dezeyo, sovre mi meza de lavoro un livro ke me mando mi ijo... el livro de David Servan-Schreiber, el mizmo mediko  i partisipante a munchas bushkidas syentifikas.... El  mos ambeza a mijor bivir, mijor profitar de esta vejetasyon luksurytante ke mos entorna en syertos lugares i ke es realmente un dono de los syelos, aunke malorozamente munchas vezes masakrada  por las nesesidades del progreso teknolojiko.

Ke mos konseja el Dr. Servan Schreiber? munchas kozas ke mos da envezes la Televizyon i ke es provechozo de repetar i repetar ... Dos o tres kozas prinsipales: a) en la mezura ande esto mos es posivle , eliminar la asukar i las dulsuryas ansi ke la karne de vaka i la godrura animal... b) konsomar lo mas posivle ajo i sevoya, dar la preferansa a los pishkados de talya chika, partikularmente  “anchuas”, “sardinas mizmo konservadas en la azete” i tambyen komo pishkado grande “Somon” (mizmo de elevaje).

David Servan Schreiber mos ansenya  ainda munchas otras kozas ke tengo la esperansa de  pueder komunikarvos en el futuro, ma oy en dia devo absolutamente  interrumpirme, por falta de lugar en esta unika pajina atribuida a la lengua de muestros avuelos.