Eske la diaspora djudia esparzida en las kuatro partes del mundo tyene el derecho de intervenir en la jeransya de la politika Israelyana?
Segun las leyes internasyonales, ninguna persona ke no tyene la nasyonalidad de un paiz, puede interferir en su politika. Ansi, Israel es inkontestavlemente un payis absolutamente otonomo, independyente en su governansa i sometido unikamente a la voluntad de la mayoria de sus propyos sitizanos.
Ma, ay tambyen (ahuera de Israel) djudyos de otras nasyonalidades ke afektivamente se syenten profundamente atados al destino de este chiko payis de superfisia malorozamente minima en raporto kon la imensidad de tyerras ajenas i munchas vezes hostiles ke la entornan.
Israel es la realizasyon de una promesa divina echa (antes siglos) a la totalidad del puevlo Ebreo... El es la konsegrasyon de una fidelidad sakra i el punto de yegada de la fervor de un puevlo durante un largo tyempo sin tyerra propya, ma ke nunka renunsyo a su sonyo “...al anyo vinyen en Yerushalayim”
Partyendo de este punto de vista, asta ke grado un djudyo de la diaspora (ke nunka partajo las amenazas kontinuales a las kualas son sometidos los ombres i mujeres ke achetaron espontaneamente de bivir en esta atmosfera de peligro perpetual) tyene el derecho de intervenir?
Veniremos al kavzo ke provoko en mi una semejante pregunta: Segun lo ke meldi (ay de esto unos kuantos dias) en el kotidyano elektroniko Israelyano “Haaretz” i en el Fransez “Nouvel Observateur”: En paralelo kon el muevo lobby djudyo Amerikano “J Street” kreado antes uno o doz anyos en New-York, por un grupo de djudyos del partido demokrato Amerikano, profundamente atados a Israel i a su seguridad, ma tambyen partizanos de la kreasyon de un estado Palestinyano , un semejante otro loby fue tambyen kreado en Evropa, debasho la denominasyon “JCall”, syempre kon el mizmo objetivo, aunke enteramente independente del ke se topa de la otra parte del Oseano Atlantiko.
I la semana pasada, este muevo lobby Evropeo echo komo un grito de alarma a los dirijentes aktuales de Israel, afin ke este payis sakro para la totalidad del djudaizmo, pueda enfin ayegar a un estado de paz i de verdadera seguridad, adriento frontyeras seguras, lo ke solo puedra garantir su perenidad.
En repuesta a la pregunta de un djornalisto del semanaryo Le nouvel observateur, David Chemla prezidente de la asosyasyon “La paix maintenant” respondyo lo sigyente:
- Estamos konstatando ke oy en dia ay un blokeo politiko .Ansi kijimos lansar “una yamada a la razon” a los Israelyanos. Les dezimos: “semos syempre a vuestro lado ma estamos inkyetos por el futuro, porke si no se ayega a una solusyon bazada sovre dos estados enteramente independyentes el uno del otro, ay reziko por Israel...”.
En desparte de David Chemla, el lobby “Jcall” es kompuesto tambyen de nombrozas otras personalidades ke lucharon i luchan syempre en favor del Payis de sus ansestros, komo: Bernard Henri Levy iAlain Finkelkraut i mizmo grandes İsraelyanos opozados a la aktual politika İsraelyana, tal el ansyano Ambasador en Fransa Elie Barnavi ansi ke munchos otros.
I de muevo revengo a la kestyon formulada al prinsipyo de esta eskrita “Eske la diaspora djudia esparzida en las kuatro partes del mundo tyene el derecho de intervenir en la jeransya de la politika Israelyana?”
Una segunda pregunta responde a la presedente. “Eske la diaspora djudia tyene el derecho de kedarse kayada kuando su patria espiritual se topa amenazada por un grande peligro?”.