La vıda de un byenfetor de muestra komunıtad

Şeli GAON Judeo-Espanyol
5 Mayıs 2010 Çarşamba

Djugeves ultimo estavamos envitados ande Mois Kohen; el grupo ke lavorimos kon el, durante tres  anyos. El fue; el presidente de los sej establesimyentos (kurum) djudyos, MatanBaseter-Barınyurt, Mishne - Tora, Orfelina, Or-Ahayim, Azilyo de los Vyejos (İhtiyarlar Yurdu), i Golden Age; i lavoro de alma i korason para pueder reushir.

Mois Kohen es una persona kayente, piadozo (merhametli), djusto (adil), i akorrido. El apiada (yardıma koşmak) a las personas ke tyenen problemas, i mira de topar solusyones, un buen merkader ke toma la inisyativa para krear (yaratmak) kozas muevas en todos los puntos de vista (her açıdan). Enteresado (ilgili) i en raporto kon todos los ke tyenen menester de sus eksperiensas.

Lavoro 37 anyos en diferentes ovras, i fue el presidente de munchas organizasyones (kurum), i asosyasyones (dernek) de muestra komunitad, i diferentes fondasyones (kuruluş) komo Lions por egzempio.

Tyene una personalitad ke se da a kerer byen kon su fineza (nezaket), politeza, persona de alma i korason (candan), i muy hovarda (eli açık).

Lavorimos kon el;  tres anyos kon muncho kalmo i de una manera pozitiva.

Kon su korason riko i su saverisyo, es una persona sezuda (olgun), ke no rompe (kırmak) al den frente i aze todo el posivle para asistir a todos los evenementos orozos i malorozos de la komunitad.

Grasyas a su mujerika dulse, i yena de kerensya Sevim Kohen; el puido kontinuar sus misyones volontaryas en todos los espasyos.

Sevim mujer entelijente, komportoza (idareci), supo dar apoyo (desteklemek) a su marido en akompanyandolo a todos los evenementos emportantes.

Mois; deve de sentirse mazalozo (şanslı) de tener este modo de mujer syempre kon la riza en la kara.

Kerido Mois; terminates tus doveres kon muncha reushitad i kapachitad.

Te oguro; una vida larga, yena de sanedad, i felisitad (mutluluk) kon tu mujer, tus ijos, ijas, inyetos i inyetas.

 Alhad ultimo fuimos envitados Matan Baseter-Barınyurt; por una seremonia ke organizaron los dirijentes; para onorar a las volontaryas ke estan lavorando de dia i de noche en dandoles una plaket komo un rekuerdo de sus lavoros i sin tener dingun intereso personal.

Komo de resivida!..... Kaliya asistir para ver, el presidente Selim Nahmias kon su mujer, la presidente de las mujeres Eti Tastasa delantre la puerta, i tres muzisyenes tanyendo; violin i akordeon, una muzika ke  estava influensando (etkilemek) a los envitados.

Los dirijentes, 70 volontaryas kon sus maridos, todos los presidentes i las famiyas de las volontaryas ke lavoraron anyos largos i se muryeron (zihrono livraha).

Por empesar mostraron en la barkovizyon; las aktivitades ke se aze en Barınyurt en kontando todo los sakrifisyos para los vyejos i para las famiyas menesterozas, la istorya de Barınyurt, el catering famozo glad kosher para los avyones, el lavoro de las volontaryas i munchos otros detalyos.

Despues; el presidente Selim Nahmias izo una avla enteresante i yena de kerensya, en enaltesyendo (yükseltmek) el lavoro de las volontaryas.

El Grande Rabino Rav. İshak Haleva, kon el Presidente de la komunitad Sami Herman avlaron kurto, en  felisitando a las mujeres ke estan lavorando,  para valir orozos (mutlu etmek) a los pansyonaryos.

Komo era “Lag Baomer”; Rav. İshak Haleva dyo un egzempio muy sinyifikativo (manalı), en dizyendo a todos los membros de la komunitad, ke deven de lavorar syempre endjuntos i kon kerensya para pueder reushir i pueder fondar una pilota de amistad (sevgi yumağı).

Enfin; el presidente empeso a yamar a las volontaryas en grupo, para pueder prezentarles las plaketes. Todas muy kontentes i glorifikandosen de lo ke estan azyendo,se prezentaron para resivir los regalos.

A la fin, el dezayuno ekselente de Barınyurt; dyo otra savor al dia organizado. Todos avlando, riyendo i vyendosen los unos kon los otros, el alhad se termino kon grande alegria i felisidad.