El komite aktualmente en funksyon de la Matan Baseter tomo la ermoza desizyon de onorar Alhad demanyana todas las personas ke desde el empesijo de su kreasyon kontribuaron, grasyas a sus esforsos, al desvelopamyento armonyozo de la ovra.
La sala de reunyon estava yena kuando (kon un grande retardo)parvine a yegar al Barinyurt.
En prezensya del Gran Rabbino Rav İshak Haleva, del aktual prezidente de muestra komunidad Sami Erman, del Prezidente honoraryo Bensiyon Pinto i del prezidente del Neveşalom Vakfı Jojo Nasi, ansi ke de numerozos notavles de muestra kolektividad, el prezidente aktual de la Matan Baseter Selim Nahmias dirijo la distribusyon de plaketas de honor a una larga fila de personas ke partisiparon a la kreasyon de este maraviyozo refujyo destinado a avrigar kualkyer persona ke tyene menester de ayudo i mamparo.
Hue un grande momento de enkontro… malorozamente, mis ojos bushkaron kon dezespero personas ke mankavan, personas ke dyeron muncho a esta ovra i de las kualas el nombre kedara syempre gravado en las paredes de este edifisyo i tambyen en mi rekuerdo.
Por kavzo de un golpe de telefon imprevizivle de la parte de una amiga de Fransa ke no asperava ma ke no puedia interrumpir, no pude personalmente ayegar a tyempo i ansi manki de oir los diskorsos ke fueron pronunsyados al empesijo de la seremonia.
Muesta kolavoradora Şeli Gaon, eya mizma ansyana prezidente de la ovra, vos dara la semana venidera informasyones mas anchas i mas presizas a este sujeto.
Mi objetivo en eskrivyendo estas linyas es simplemente de ekspresar mi gratitud enverso el prezidente aktual Selim Nahmias i a su komite, por sus ermoza inisyativa de no deshar en el olvido todo lo ke fue echo asta agora.
