Batya Natan

La konseja de dos madres

La konseja de dos madres

El lektor va topar oy en mi pajina 6. de “El Amaneser” una kompozisyon para el sigundo Alhad de Mayo. En el “Şalom” ye se izo komo tradsyonal de eskrivir sovre el “Diya de la Madre”. Puede ser ke van eskrivir i otras amigas. Yo aki vos kero kontar la konsejika ke me inspiro la poeziya miya de la sobredicha kompozisyon, kon el mizmo titolo. No miresh ke dishe konseja, es  estorya verdadera, i konosko todos los eroes. No tiene nada de orijinal, de espesyal, ni muy enteresante a mi opinion. “Alora si es ansi ke menester ay de kontarla?”..Tenesh razon keridos lektores de pensar ansi!!.. Me aviya echo sonreir kuando la sinti i me azeriya plazer de ver, mizmo una chika sonriza en la kara de los lektores. Un poko de alegriya no aze  danyo a dingunos.

Las eroinas son dos madres. La una ke vamos a yamar Deyzi tiene un ijo. Mos frekuentamos bien desde munchos anyos, i me konto este vyejo pasaje. A la sigunda madre ke tiene una ija, la yamaremos Meyzi. A eya tambien la konosko un poko. Estas dos damas, desde sus chikez bivyeron en el mizmo sentro, meldaron en la mizma eskola ma en diferentes klasas. Deshad frekuentarsen, no se avlavan, no tuvyeron un saludo (kuryozo!!). Anyos pasando se pyedreron de vista, kazaron, tuvyeron famiya i naturalmente trokaron de sentro!

Komo syempre el azardo izo su djugo, aranjando! despues de tantos anyos, ke moren serka. I no abasta esto, ke se topen los enveranos en la mizma “Ada”. Komo lo dishe, konosko bien Deyzi. En verdad ke es una persona muy afavle, kara de riza i amiga kon todos. En kontandome esta estorya me disho ke Meyzi, de su chikez teniya komo una grandeza i no era muy popular mizmo en la eskola... Enfin.. En sus mueva “maale”, se enkontraron en la kaye, en el market ets... Despues de tantos anyos afilu no se saludaron, lo ke asigun Deyzi era enteramente la verguensa de la otra...

Otruna vez, el azardo pizmozo! izo ke Meyzi venga a penyarse al mizmo kuafor de Deyzi. Una konosida las prezento una a la otra. Despues de akel diya ampesaron a avlarsen, forsadmente!!! En realidad, me konto Deyzi, fue Meyzi ke ampeso a su monologo!, a sus kestyones sin fin. Preguntas sovre la situasyon del marido, el ijo meldando afuera, detalyos sovre la famiya ets... I miraklo! Meyzi se izo “ mi alma, mi vida!” kon Deyzi i le echo el gancho si se puede dizir ansi...

Si keresh saver, los mansevos en un grupo de enverano ya se konosiyan, ma no teniyan dinguna intimidad. Deyzi ya estava entendyendo el plan, el dezeo de la otra. Siguro ke el mansevo era un buen partido. Deyzi se estava amuzando a ver los esforsos, la pena ke se estava dando Meyzi para entrar en ojos! despues   tantos anyos de kaji “dezdenyo”... Deyzi ya saviya ke era pena en baldes, le estava vinyendo komik, riendose entre si... Lo ke no saviya Meyzi era ke el mansevo ya teniya una amigita, mas ke amiga. Estavan asperando la fin de los estudyos i su retorno a Estambol para anunsyar un angajamiento, o puede ser un espozoryo...

Lo ke vos konti paso antes munchos anyos. Seya los unos, seya los otros mansevos se kazaron, tuvyeron famiyas. I un punto enteresante, la ermuera de Deyzi fue amiga de eskola de la ija de Meyzi. De vez en kuando se ven en reunyones de eskola. Asigun Deyzi, los mansevos nunka supyeron esta estorya ke yo mizmo konosi poko tyempo antes solamente. Vos desho kon mi poezia de “El Amaneser”, kon un final un poko diferente...

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
614