Gmar hatima tova, eskritos en los livros de ley, anyada buena i klara, pas i amor en el mundo, sanedad i prosperitad a todos los umanos.
Ya pasimos estas dos fyestas emportantes ke tyenen un lugar espesyal en muestra vida.
Rosh-Ashana es el empisijo de una anyada mueva para los djudyos.
Estuvimos en la sinagoga de la isla de Burgaz, akompanyados del Grande Rabino Rav. İzak Haleva i su mujer Rejin Haleva. Fue una orasyon espesyal kon la derasha del Grande Rabino, i la nochada komimos 150 personas endjuntos en la koloniya de Burgaz. Estavamos komo una famiya; todos kon sus famiyas, los grandes, madres, padres, ijos, ijas, inyetos i inyetas....
Las mezas muy byen ordenadas kon los manteles blankos i las rozas en medyo , las komidas muy savrozas.
El emportante era ke; el Grande Rabino izo la orasyon de todo lo ke komimos en dando detalyos de todos los produktos muevos (yeni ürün).
Rav. İzak Haleva avlo sovre el sujeto de la formasyon del mundo, Dyo ke konkrio este mundo para los umanos i ke kale remersyar a todo modo de evenementos para pueder bivir orozos.
Estava muy kontente i alegre de esta reunyon, i transmetyo (iletmek) una atmosfera pozitiva a todos.
Los partisipantes de esta nochada estavamos todos alegres, riyendo, orozos de estar kon muestras famiyas aunados.
Bushkaremos la Verdad (hakikat) en el nasimyento de la natura i del mundo, en la ariskuridad de la noche, en el briyo de las estreyas, en las ojas vedres de los arvoles, en el guesmo (koku) de la roza, en las onduras de la mar, en el kante de aninar (ninni), en el yoro del muevo nasido i en la kerensya del padre.
Rosh-Ashana es el dia de la kreasyon i Kipur es el dia del djuzgamyento (yargı), de azer teshuva (af dileme). Las personas rogan, demandan pardon del todo el Puederoso.
Topamos en la Verdad; la grandor, la eminensya (yücelik), el pueder kreativo (yaratıcı güç) del Dyo.
Mizmo la muerte, es una realitad, es un konsepto de verdad ke se topa aryento del todo el Puederoso.
La sinyifikasyon del byervo “Emet” en ebreo es la Verdad (hakikat). “Emet” en ebreo se eskrive kon las letras alef – mem – tav.
Alef es avir; la natura.
Mem es mayim; la agua.
Tav es la tyerra.
Alef es la primera letra de la alfabe ebraika.
Mem es la letra de en medyo.
Tav es la letra de alkavo.
Aryento de “EMET” ke sinyifika la verdad; se topa el byervo “Met”, ke es la muerte.
Alef es uno de los nombres del todo el Puederoso.
Keridos Lektores; kale saver la valor de muestra egzistensya, topar plazer de las kozas las mas chikas, i en primero de todo kale saver kerer byen al den frente.
No devemos de kritikar kualkyer koza, pensar lo bueno i ser pozitivos. Transmeter muestra enerjiya pozitiva al den frente i bivir orozos kon muestro entorno.
Las fyestas son las okazyones para aunar la famiya, los ke estan solos, i los ke tyenen ambre.
Es una satisfaksyon de arekojer a todos en el entorno de una meza.
Despues de Rosh-Ashana ke aviya muchedumbre (kalabalık) en el kal de Burgaz, i Kipur fue muy reushido i muy kalmo. Todos kontentes de la orasyon, el tyempo tivyo, mansevos, mujeres, ombres i aedados todos endjuntos, komo una famiya. Esta unyon es la espesyalitad (özellik) de Burgaz.
Mi marido Meir GAON ke es el gabay de esta sinagoga; avlo sovre la emportansa de la Mujer, de la Madre Djudiya, ke la djenerasyon (nesil) vyene de la mujer, i el lugar konsideravle ke tyene la Mujer.
Entonses Meir dyo un egzempyo; ke una de muestras Madres ke son; Sara, Rivka, Lea i Rahel; la tomba de Rahel se topa en Bethlehem; enriva del kamino de ande pasan todos los karavanas (kervan), i todos orasyonan (dua etmek) aki.
Rahel arrogava al Dyo; para ke su puevlo (los djudyos) tornen atras de Misrayim, i eyos tornaron.
Aki puedemos ver; el Pueder de la Mujer; ke si la mujer kere una koza todo se realiza, se afirma, i kuando eya no kere, todo se dezaze.
La boz del Shofar, mos amostro ke el dia santo ya estava para eskapar, todos kon grande emosyon orasyonando i dezeando kozas buenas para la anyada mueva.
Keridos Lektores; el Dyo ke mos ayege para kada anyo, kon todos djustos, sanos i rezyos, i azlaha i beraha. Ke todos muestros dezeos se afirmen!...
Hatima Tova. El Dyo syempre ke este kon mozotros.
