Problemas djudyos problemas humanos

Klara PERAHYA Judeo-Espanyol
22 Eylül 2010 Çarşamba

Un rayo de luz en la oskuridad

Despues de la segunda entrevista Mahmud Abbas i Benyamin Netanyahu, el prezidente de la Autoridad palestinyana deklaro ke “no ay otra alternativa”, lo ke  probablemente kere dezir ke no ay otro remedyo ke  ‘avlar’, ‘avlar’ i ‘avlar’ asta ayegar a un akordo.

El proksimo enkontro entre los dos leaders sera en kinze dias.

Un soplo de esperansa i puede ser de  esforso de komprensyon  mutual  parese despuntar al horizente

Kontroversya en Israel konsernando la ekspulsyon de ninyos estranjeros:

 Israel va empesar a ekspulsar los imigrantes ke se topan en situasyon irregolar, lo ke provoka aktualmente un debate  vehemente entre “los  ke  se esmoven al sujeto de los ninyos ke (aunke sin ningun dokumento ofisyal) nasyeron , bivyeron asta oy  en Israel i avlan perfektamente byen el Ebreo” versus “los ke pensan ke akseptarlos otomatikamente puedra en el futuro meter en reziko la identidad djudia del Estado Ebraiko”.

A la remarka de Elie Wiesel ke disho “ke azesh del korason djudyo?”, “de la kompasyon djudia”? el Ministro del Interyor respondyo “Al pareser, ninguno se preokupa de la futura identidad djudia del  Estado de Israel”

 Esto dicho, el Governo ya anunsyo desde el mez de Agosto su intisyon de akordar el titolo de “rezidente permanente”  a los ninyos ke responden a los kriteryos sigyentes: ‘ser ijo o ija de imigrantes regolares ke entraron legalmente en el payis’, ‘bivir en Israel a lo manko desde 5 anyos’, ‘ser eskolarizado’, ‘avlar de una manera koryente el Ebreo’ i ‘ser edukado komo lo son todos los ijikos Israelyanos’.

Komparasyon ahuera del lugar de la Komisarya Evropea a la djustisya:

‘Viviane Reding, commisarya Evropea à la Dyustisya i a los derechos fundamentales del ombre’ izo un djenero de aserkamyento entre  la “repatriasyon  de los Jitanos ke se topan aktualmente en Fransya a sus payiz de orijen, el payis del kual eyos son lo reales sitizanos” kon el periodo oskuro del nazizmo, ande  6 milyones de djudyos fueron embiados en los kampos de la muerte.

“Azer este aserkamyento entre los dos evenementos’’ es no solo una indjurya  enverso un  prezidente ke kere enrezyar la seguridad de su puevlo, ma tambyen  (lo ke es ainda mas  aflijente) una banalizasyon de la gravidad del mas terrivle krimen de la historya.

Por seguro ke no se trata de una mala intisyon enverso el puevlo djudyo, ma el simple fakto de minimizar la trajedia ke fue la Shoa asta azer de eya un punto de komparasyon kon situasyones de gravidad ordinarya,  riska de renforsar las teorias negasyonistas.

Avyertura del mas grande sentro de kudyos sanitaryos i otros en Haifa:

El Prezidente Shimon Peres estava prezente en la seremonia de avyertura de un sentro de kudyos sanitaryos  a domisilyo, destinado ekskluzivamente a los supervivyentes de la Shoah ke se topan en estado de prekaridad.

La inisyativa es finansada por la Embashada Kristyana İnternasyonal i tambyen por el Organizmo karitativo Yad Ezer.

El “Jerusalem Post” mos dize ke seran igualmente prezentes durante la nochada de inogurasyon: el Gran Rabbino ashkenaz  Yona Metzger, el direktor de Yad Vashem  Israël Méir Lau,  el shefe de la opozisyon Tzipi Livni, ansi ke los ministros  Eli Yishaï, Moshé Kahlon, Matan Vilnaï, Guilad Erdan  i otros responsavles del Governo.

Mas de 2000 personas, esensyalmente los supervivyentes de los kampos de la muerte nazis,  benefisyaran de la kreasyon de este Sentro.