Retorno a “negosyasyones direktas entre Israel i la Otoridad Palestinyana”
Segun lo ke meldimos en la prensa: Vyernes pasado Hillary Clinton anunsyo el re-empesamyento el 2 Septembre, en Washington, de las negosyasyones direktas entre el Estado Hebreo i la Otoridad Palestinyana, interrumpidas en el mez de desembre 2008.
Netanyahou deklaro ke eyas devran ser bazadas sovre garansias de seguridad i rekonosensya de la parte de los Palestinyanos, de “Israel komo el estado del puevlo djudyo”.
El disho: “Revenimos a las negosyasyones kon el sinser dezeo de parvenir a un akordo de paz entre los dos puevlos, todo en protejando el interes nasyonal de Israel i partikularmente su seguridad”.
La invitasyon a reempesar estas negosyasyones direktas fue echa por el ‘’Kuartet para la Paz en el Oriente Medyo’’, kompuesto de los Estados Unidos, la Rusia, la Unyon Evropea i las Nasyones Unidas.
Los delegados de esta institusyon fueron kombidados a asistir a la primera seduta .
El Dyo aga ke estas negosyasyones ayegen a un real tratado de paz i ke reyne la serenidad, la amistad i la azlaha en los dos payizes.
Un Israelyano entre los kuatro loreatos ke resivyeron la dlstlnksyon ekuivalente al premyo Nobel de Matematika
El Profesor Elon Lindenstrauss de la Universidad Hebraika de Yerushalayim resivyo una de las kuatro medalyas Fields 2010, ekuivalentes al Premyo Nobel de Matematika. Esta distinksyon es atribuida kada kuatro anyos a kuatro savyos konsiderados komo los mas grandes matematisyanos aktuales. Los otros tres loreates son dos Fransezes i un Hindu. Elon Lindenstrauss es el primer Israelyano ke obtuvo esta prestijyoza distinksyon.
Los dos kriteryos de baza de la atribusyon de este premyo son: “tener manko de 40 anyos” i tambyen “aver realizado numerozos lavoros de grande valor”.
Segun el direktor de la Universidad Hebraika, ay munchos otros matematisyanos muy meresyentes en Israel, ma el fakto de dever azer dos o tres anyos de Servisyo Militar los empide de realizar una ovra bastante grande antes la edad de 40 anyos.
Fotografias ke desgustan
No se si es un fenomeno psikolojiko koryente , “ semos personalmente, mozotros djudyos, muncho mas severos kuando se trata de una kulpa o de un simple yerro echo por uno de los muestros, ke kuando lo vemos ande los otros”.
Puede ser ke un djenero de egzijensya egzajerada enverso mozotros mizmos o “un dezeo imperyozo de perfeksyon” mos pusha desde siglos a no akseptar ke uno de muestro puevlo viole el kodigo de onor ke tenemos la iluzyon de dever posedar .
Ansi, myerkoles pasado el 18 del mes koryente, tuve el dezplazer de segir en el posto de Televizyon “France 24” un debate al kual preferaria realmente no asistir.El tema de la diskusyon era esta inyovle fotografia ke paresyo en un “Face book” reprezentando una soldata Israelyana pozando delantre dos prizonaryos palestinyanos ke tenian los ojos bandados i las manas atadas kon una kavena.
El solo akto de fotografyarse en una semejante sirkunstansya i de azer sirkular esta pelikula es en si mizmo realmente blamable.Sea lo ke sea la dimensyon de sus kulpas, estos dos prizonaryos kedan syempre kriansas humanas i ninguna persona (kon o sin razon) tyene el derecho de djugar kon sus dinyidad.
Los partisipantes al debate eran (en desparte del gazetero ke dirijia el kolokyo): el vice prezidente de la asosyasyon a tendensyas tyer-mundistas “Amnesty”, ombre egzajeradamente kritiko en su djuzgamyento, en el kual se sentia el dezeo (ke ekspreso por seguro de una manera muy diplomatika) de jeneralizar el kavzo i de atribuirlo a kaji la totalidad de la armada Israelyana .
Fueron tambyen invitados al torno de la meza, un sinyor ke yevava el nombre de un grande ombre de Estado Fransez de orijen djudia “Mendes-France”, el kual manifesto una vizivle imparsyalidad ansi ke un gazetero Israelyano ke, todo en blamando el akto de la soldata, izo un grande esforso para mentenerlo al nivel individual.
I komo partisipantes por telefon :Un funksyunaryo Israelyano ke se esforso tambyen de eksplikar el kavzo en su dimensyon real i un avokato syempre djudyo- Israelyano ma tyermundisto, ke konfirmo i mizmo insistyo sovre la jeneralizasyon de la kulpa i la espandyo a la armada entera..
La shena era penivle i muy desplazyente. Es seguro ke la kulpa de la soldata es blamable , ma anchearla asta jeneralizarla parese inkontestavlemente un akto de mala intensyon.
Semejantes aktos son malorozamente frekuentes en kualkyer otras armadas en estado de belijeransya , ma munchas de entre eyas no tyenen este prinsipyo de klaredad i transparensya ke poseda la Israelyana, la kuala fue la primera a denunsyar la fealdad del akto de la soldata.
