Kada dia mas, el mundo se esta topando delantre problemas difisilmente soluvles ke pushan las opinyones a eskojer direksyones diferentes i mizmo envezes opozadas; solusyones ambivalentes ande los mizmos elementos paresen tener dos fachas: La una briyante, resplendisyente de solidaridad i de humanizmo, ombres i mujeres ke koren traer kudyos i ayudo a los desmamparados de los payizes persigidos por un destino implakable, lo ke es el kavzo de la mas parte de asosyasyones karitativas nombradas ONG.
La otra (facha) es eskuresida, eya, por motivos de simple propaganda politika afin de obtener lo mas posivle de bozes en favor del ideal politiko ke las animan, inkonsyentes de la gravidad de syertas ideas ekstremistas empapadas de odyo.
Ansi, una partida de la opinyon publika pretende ke tal fue el kavzo de las ONG islamistas ke koryeron para ser las primeras a akudir el puevlo Pakistanezo en el desmamparo despues de las luvyas ke undyeron una partida del payis, korporasyones karitativas ke se esforsaron de toparsen en el lugar mizmo del drama muncho antes ke los ekipos de la ONU o de los Estados Unidos sometidos eyos a inevitables formalidades prealables.
El akto en el mizmo es sublime i por seguro partisipo a salver numerozas personas de la muerte. Asta poko antes imajinavamos ke estas asosyasyones de byenfezensya chikas o grandes syempre prontas a servir sus proksimos, reprezentavan la facha luminoza de un mundo pedrido en el materyalizmo i el egoizmo... Ma, al dezir de munchos komentadores partikularmente pesimistos , la politika kon su inevitavle “voluntad de dominasyon” empeso poko a poko a azer su lavoro korrozivo.
Si lo ke dizen estos analistos es konforme a la realidad, ke se puede en este kavzo pensar de esto aktos karitativos ande el “Mal i el Byen” se topan inekstrikavlemente mesklados el uno al otro?
Ke se puede de mezmo pensar al sujeto del proyekto de konstruksyon de la parte de la Komunidad Muzulmana Amerikana, de “una Meshkita i de un Sentro kultural” fraguados sovre un terreno ke le apartyene, muy muy serka del “Gound Zero” ande se topavan las dos torres del World Trade Center destruidas salvajamente por “Al Qaida” al nombre del Dyo, lo ke provoko la muerte de 3000 personas de orijen i kreensas diferentes; proyekto fuertemente sostenido por el governador de New-York “Michael Bloomberg” en sinyo de “paz” i “toleransya”?
Despues de un largo momento de ezitasyon, Barack Obama tambyen vyene de dar su konsentimyento, en el eskopo de konfirmar ke los Estados Unidos tuvyeron i tyenen syempre “un prinsipyo inalteravlement favoravle a la libertad de relijyon”.
En este momente la opinyon del puevlo Amerikano se topa en estado de grande rebuelta, kaji todos los Republikanos ansi ke munchos demokrates i tambyen syertas institusyones djudias komo el “ADL” estan kompletamente opozados a la konstruksyon de una “Meshkita” a proksimidad del lugar ande muryeron en kondisyones inhumanas 3000 personas, eksterminadas al nombre de una kreensa ekstremista.
En efekto, el problema es muncho mas ancho ke una simple afirmasyon de la libertad de kulto, ke nunka manko en los Estados Unidos...
Ke es la verdadera sinyifikasyon de la konstruksyon de una meshkita i de un sentro kultural i puede ser kultual a proksimidad de este lugar de dolyo? Ke sera la desizyon definitiva?
Eternal kestyonamyento de la persona del 21en siglo, eternal bushkida de la verdad.
