Batya Natan

Rekuerdo de una trajediya

Rekuerdo de una trajediya

11Agosto 1976, oras 16.00... Aeroporto de Estambol...Un avion Alitalia vinyendo de Roma, debarko en el salon “Transit”, pasajeros para Bağdad. NO pasaron por dingun kontrol de bagaj de mano... Poko despues arivo el avion EL-AL, vinyendo de Tel-Aviv. Se vazyo kompletamente. Los pasajeros, despues del kontrol pasaporto, entraron a la duana.(dingun raporto kon el salon transit). Este mizmo avion deviya partir akeya noche a Tel-Aviv kon 130 pasajeros. Syertos, despues del kontrol de bagaj de mano ya estavan asperando en el “apron”, para suvir al avion.

Dunke, en el salon estavan el resto de los pasajeros (de diferentes nasyones) para Tel-Aviv i los otros para Bağdad kon avion Pakistanezo. A un momento, dos mansevos de este grupo se mesklaron al rango de El-Al. Sospechozos, los polises demandaron al un mansevo de avrir la chanta de mano. Sovre su refuzo, el polis avyendo de fuersa la chanta, uvo un bruido terrivle i una grande eksplozyon, firyendo los polises.

Entervalo, el sigundo terroristo ampeso a tirar a syedra i derecha kon un fuzil (tüfek) otomatiko. Unos se echaron enbasho, otros fuyeron bushkando un kanton para eskondersen. Solo se estava sintyendo gritos i las “tarakas” de las armas gomitando sangre i muerte. El bilanso de este karnaje (katliam) fue 4 muertos i 22 firidos de vista tranportados a diversos ospitales.

Entremyentes, una partida de los pasajeros para Tel-Aviv, ya estavan aryento el avion, djuntos 8 firidos ke aviyan reushido a fuyir. El pilot, tomando la konsinya (emir), partyo de vista kon 82 pasajeros. En el Aeroporto Ben Gourion las ambulansas estavan prontas i tomo los 8 firidos eskapados del ginnam de Yeshilköy...

El eskopo de los terroristos era azer eksplozar en el ayre el avion kon todos los pasajeros. Despues trokaron sus deklarasyon (ifade) en dizyendo ke ivan a fuyir el avion El-Al a Uganda i entregarlo a Idi Amin, komo vengansa del atako ke izyeron las fuersas israelyanas a Entebbe (Uganda) el 4 Julyo...

No me topi en el momento del atako ma, solamente una ora despues, mi marido, mi ijo i yo entrimos al korason de la trajediya. Porke entre los ke ivan a partir para Tel-Aviv, aviya sinko miembros de mi famiya, donde los dos eran Violet i Ernest Eliash, esfuegro i esfuegra de mi ermaniko. Malorozamente Ernest fue el primer a kayer, sin vida djuntos tres otros. Poko tiempo despues, non remetido de las firidas muryo tambien i el ermano de Violet Eliash.. (detalyos “El Amaneser No.18).

Los diyas sigientes, en primero bushkimos los firidos ke estavan en diferentes espitales. Ayudimos a transportarlos al Hopital Pasteur del Taksim ande los arrekojimos todos a la eksepsyon de los operados graves ilos de “intensive care” (yoğun bakım) de Çapa. Asta el diya ke partyeron kon el avion ambulansa ısraelyano, mos okupimos de eyos. Komo se esta vyendo yo teniya fuertes razones de enteresarme al evento. A la epoka, las informsyones de la prensa fueron mankas, kuando yerradas. Aki unas, kuantas linyas del “Şalom” de 18 Agosto 1976: “ ...estas dos personas eran Palestinianos, tomaron las armas de Libya, pasaron a la Italya i de ayi vinyeron a Estambol... Se mesklaron a los viajadores de Tel-Aviv, asigun el plano ke aviyan aparejado. Komo kometen un tel akto en Turkiya, pais amigo de los Arabos??.. Aviyan tomado el orden de matar al tanto posivle de Israelyanos. Si es ansi deke tiraron sovre las fuersas de siguridad?... Esto preva una vez de mas ke los teroristos no son sinseros....”

Esto preva tambien ke el terrorizmo es syego, inumano (insanlık dışı) i sus razones falsas. ipokritas, abominavles (iğrenç). En el avion El-Al aviya pokos Israelyanos, munchos turistos Japonezos, Amerikanos, Fransezes, Suisos ets... Esto sigura ke nunka me vo olvidar este triste pasaje del Agosto 1976.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
541