Un grande amigo de Israel ‘Guy Milliere’

Klara PERAHYA Judeo-Espanyol
11 Ağustos 2010 Çarşamba

“Komo si se aparejava una segunda Shoha” tal es el titolo del proksimo livro de Guy Milliere, eskritor Fransez, defensor de varyas teorias  liberales i neo konservativas, profesor asistante en la Universidad Paris VIII  ande ensenya la Historya de  varyas kulturas i de la filozofia del “derecho”, eksperto serka de la Unyon Evropea en “bioetika”, grande admirador de los Estados Unidos ande fue profesor vijitador en la “ California State University” .

Profundamente pro-Israelyano, Guy Milliere esta  aparejando un livro sovre lo ke el yama “la diabolizasyon de Israel de  parte de los medyas en jeneral i partikularmente de los kotidyanos i revistas fransezes”

Segun lo ke el mizmo deklara en la revista “İnformasyon Juive”, se syente aktualmente en la Evropa i sovre todo en Fransya, komo un retorno del antisemitizmo i antisionizmo, espesyalmente en la prensa.

El mos dize ke  no se trata de un konteksto  de progromos anti-judaikos en Evropa ni tambyen de una akseptasyon unanima  de la destruksyon i eliminasyon  de İsrael de la karta jeografika del mundo,  ma de  una atmosfera ande munchos avlan kontinualmente de una kolonizasyon del puevlo palestinyano i mizmo syertas bozes frankamente negativas van asta afirmar ke la prezensya de Israel en esta rejyon del Oriente Medyo konstitue un verdadero problema.

Syempre segun  Guy Milliere, un odyo kontra Israel es poko a poko infiltrado en el pensamyento Evropeo, las kavzas  de esta situasyon terrivle i infame  son konosidas: un kontinual lavoro de propaganda fue echo minusyozamente i infatigavlemente, de la parte de los dirijentes de varyos movimyentos palestinyanos ansi ke de payizes Arabos. Debasho el titolo de “ lucha para la liberasyon nasyonal“,  empeso una verdadera lucha para la destruksyon de Israel...  la armada İsraelyana fue komparada a la armada nazi i los kampos Palestinyanos a los kampos de konsentrasyon.

Esta propaganda topo en la Evropa un terreno favoravle, sovre todo en la prensa i los partidos ekstremistos  sosyalistos i partikularmente komunistos.

Los gazeteros i intelektuales syendo mayoritaryamente tyer-mundistos, los Palestinyanos les ofresyeron “un puevlo pretendido ser oprimido” a defender, i un eroe al imajen de  Che Guevara “Yaser Arafat”.

El mizmo lavoro de “propaganda negativa” fue tambyen echo en los Estados Unidos, ma el puevlo Amerikano en su grande mayoria es pro- Israelyano. Ansi, kaji todos los preszidentes ke se suksedaron a la kavesa del payis fueron syempre grandes simpatizantes de Israel .

Para Guy Milliere, Barack Obama konstitue un punto de interrogasyon.

Asta ke nivel este dubyo tyene su justifikasyon?  No savemos. Ma, no mos olvidaremos ke Obama eskojo  konsejeros djudyos i ke avlo de la indefektivle amistad Amerikana enverso Israel en  la konferensya ke el avia dado en Kayro mizmo.

“Los dias avlaran” dize un vyejo presepto djudyo...

Eske esta situasyon ke parese inekstrikavle puedra un dia ayegar a una solusyon akseptavle? İmposivle de responder kategorikamente, puede ser kon una verdadera voluntad de paz de las dos partes, kon difisiles esforsos ansi ke  muncha komprensyon  i sovre todo una akseptasyon  resiproka ke todos tenemos derecho a la vida, a la seguridad i a un poko de amistad.