La semana pasada el “Jerusalem post” mos dyo una terrivle novedad i pokos dias mas tadre resivi tambyen un e-mail de la parte de la kerida Süzet Fransez, tratando del mizmo sujeto. El fakto en el mizmo es mas ke trajiko, inhumano, lo ke mos pusha a pensar a un akto de lokura irrezistivle . “ un ombre por razones ke trespasan de leshos muestra simple lojika humana ,aogo (estrangulo) de sus propyas manos, sus tres kriaturas...
Ma no es de esto ke personalmente kero partikolarmente avlar en este artikolo , los djuzgos i sovre todo los psikologos ke seran por seguro konsultados, puedran puede ser aklarar los motivos de este djesto kontra natura.
El punto el mas sorprendente de este drama es;” una vezina muy serkana ke oyo los gritos de dezespero de uno de los ninyos, implorando ayudo i suplikando el padre de no kometer el akto irreparavle , una mujer ke no izo el meno djesto para responder a esta yamada afin de akudir las desmazaladas viktimas”.
A la pregunta de la polisia konsernando esta absensya de reaksyon, eya respondyo kon muncha kandor: “Yo so muy relijyoza, era dia de shabat i la ley mos rekomenda de no azer la mena koza en este dia, salvo orasyonar i meditar”.
Si el kavzo en el mizmo es dramatiko, la replika de esta mujer en posesyon de toda su lusididad, lo es ainda mas...Esta repuesta es kaji la fayita de un sistema de persepsyon de muestras leyes de baza, lo ke riska de destruir el potensyal de refleksyon i de humanizmo djudyo.
La konsepsyon del dia de “ Shabat” es inkontestavlemente sakro i servyo mizmo de baza a munchas evolusyones sosyales ....”la observansya del ritual i de las tradisyones” tambyen... Eyos aseguran la perenidad del puevlo djudyo ... ma, mas arriva, ensima de estos deveres inkontestavlemente ovligatoryos, ay la sakralidad de la “vida”, la sakralidad de muestra vida i de la vida del otro , ken ke sea este otro... es esto ke se topa en los fundamentos del Djudaizmo.
El sinkyen komandamyento del dekalogo mos rekomenda “No mataras” lo ke implika la rigoroza ovligasyon de azer todo lo ke es humanamente posivle para no deshar murir ninguno... Kada uno, a la mezura de su poder, tyene la responsabilidad de los otros.
En su konsepsyon de la vida, el Djudaizmo es en realidad una grande lucha no solo kontra el mal , ma tambyen kontra la indiferensya; “ No semos solo responsavles de lo ke azemos ma tambyen de lo ke no azemos “ eskrivyo Moliere en una de sus ovras...
Martin Buber mos dize “ mi Yo se kumple al kontakto del TU, devengo YO en dizyendo TU. La relasyon al Otro es el fundamyento del humanizmo djudyo”.
Probablemente ke, infokados partikularmente en la estrlkta ensenyansa del ritual relijyozo, los maestros de la dicha vezina ke oyo el grito de dezespero del ninyo i no koryo para akudirlo porke era Shabat, mankaron de insistir sovre la importansya de la “etika djudia” ke konstitue la verdadera baza de su espiritualidad.-
