Vengo de resivir el ultimo livro de Maurice Asseo, grande amigo de İzzet Keribar, todos los dos amorozos de “fotografia”.
Varyas personas konsideran la fotografia komo un arte minor. Del punto de vista artistiko, tyenen puede ser razon, ma por kontra (grasyas a su relativa rapididad de egzekusyon) eya tyene un aventaje sovre la Pintura, eya mos transmete no solo el imajen de una persona, de un objeto o de una situasyon en su sola realidad, ma tambyen en la realidad del momento ande fue egzekutido el lavoro. La vizyon de una persona, objeto o situasyon, aunke al pareser estatika, no keda nunka la mizma; todo se topa en un estado de movimyento perpetual.
Personalmente, no tengo ninguna konosensya de las teknikas de este arte, ma syento sin pueder egzaktamente dar la razon, ke envezes kada klishe fotografiko / en su relativa simplisidad) tyene la kapasidad de azer suksedar diferentes aspektos de una mizma koza.
Una kara humana no es solo una boka, dos ojos, dos orejas i una naris, ma tambyen i sovre todo la emosyon ke la anima , el sentimyento ke se reflekta a un syerto momento en su mirada , la dulsor o la amargura de los mushos en su sonriza.
Esto es probablemente el avantaje de la fotografia sovre la pintura ke eya manka de instantaneidad i no tyene la posibilidad de fiksar kuakyer koza en sus diferentes aparensyans segun el ambiente i el estado de esprito del momento.
Ansi es el livro de Maurice Asseo, intitulado “Bhutan, the Land of the Thunder Dragon”. Grasyas a varias fotografias i a los chikos tekstos debasho de eyas, el mos avla rapidamente del pasado ansi ke del prezente de este chiko payis ainda muy poko konosido del mundo oksidental. La palavra “Bhutan” sinyifika en la lingua nasyonal “dzongkh”, Drago de los truguelos.
Enganchado entre “las Indyas” i “la Kina” muy serka del Tibet, el Reynado de Bhutan tyene una populasyon muy chika en raporto kon su superfisia ke eya mizma no es muy grande.
Segun chikas investigasyones ke pude azer a su sujeto: “Independente en 1949, este chika monarkia entro realmente en la historya solo en 1972. En estos anyos, sovre una populasyon global de un milyon 400 mil sitizanos, los 800.000 eran de orijen Nepales.
Su sistema de governansa a esta epoka era partikolar , muy leshano de los ke mos son konosidos. Entonses , en el eskopo de asegurar la felisidad a su puevlo, el monarko del payis “Jigme Singye Wangchuck “ penso ke por el momento kalia luchar kontra tres faktores konsiderados komo perikolozo : “la Imigrasyon muy nombroza”, “el Turizmo” i “la muy grande Libertad relijyoza”.
Segun el, la muy grande ekspansyon del payis pudia riskar de ser portadora de konfliktos, i esto es la razon por la kuala la sosyedad devia ser lo mas posivle “etöSe entyende byen ke aktualmente la situasyon evoluo i kontinua a evoluar progresivamente. Munchas kozas trokaron en el milenaryo 2000. El Rey “Jigme Singye Wangchuck” desidyo ke su payis ya era bastante maduro i redakto el mizmo el teksto de la konstitusyon de una “Monarkia konstitusyonal” ke devia remplasar la “Monarkia otokratika” . Mas tadre el abdiko en favor de su ijo “Jigme Khesar Namgyel Wangchuk” al kual, el rekomendyo de kontinuar su ovra de adelantamyento. Es ansi ke las “primeras lejislativas” tuvyeron lugar en 2008.”
En sus varyedad mizma, las fotografias del livro “Bhutan, el payis del drago de los truguelos”, mos dan una idea de esta evolusyon i en mizmo tyempo mos transmeten el imajen de un puevlo feliz, malgrado un nivel ekonomiko no muy alto.
Todo interesa Maurice Asseo en su lavoro de fotografo , su esprito es syempre avyerto a todo lo ke se topa de la otra vanda del orizonte vizivle.
En desparte de su kuryozidad natural, el fue muy favoresido por su posto de “responsavle de proyektos” konsernando el desvelopamyento de “payizes en difikultad ekonomika”, en la FAO komo tambyen en la Banka Mundyal (Dünya Bankası).
El tuvo ansi la okazyon de vijitar lugares deskonosidos muy leshanos en diferentes partes del mundo i la primera koza ke el metia en su validja era se entyende byen su kamera de fotos...
P.S.
Los lektores ke serian dezeozos de ver en detalyo el kontenido de este livro, pueden entrar en Yahoo o Google i bushkar “Maurice Asseo Bhutan “