“Faith Matters”, Fondasyon ingleza teniendo komo eskopo de propajar la tolerensya entre las diferentes relijyones, edito un lavoro intitulado “ The Role of Righteous Muslim Persons”. Mi  teksto en komemorasyon de una data, es tambien sovre uno de akeyos  “Djustos Muzulmanos”: Selahattin  Ülkümen. Los lektores del “şalom” konosen bien este nombre...

" />
Batya Natan

24 Julio 1944... RHODES

“Faith Matters”, Fondasyon ingleza teniendo komo eskopo de propajar la tolerensya entre las diferentes relijyones, edito un lavoro intitulado “ The Role of Righteous Muslim Persons”. Mi  teksto en komemorasyon de una data, es tambien sovre uno de akeyos  “Djustos Muzulmanos”: Selahattin  Ülkümen. Los lektores del “Şalom” konosen bien este nombre...

24 Julio 1944... RHODES

Konsül Turko de Rhodes los anyos 1943-44 salvo de los nazistos 42 djudios, al koste de su vida. Tengo su livro otobiografiko, kon su “otografa”. Tuve la okazyon de konoserlo par el  intermediaryo de Va..., una serkante suya i buena amiga miya. Bazandome sovre lo ke me konto i otras informasyones realizi este teksto. Va.. me relato el viaje ke izyeron a Israel para la seremoniya istorika en “Yad Vashem”, ande el ex Konsül fue onorado komo “Righteous Among the Nations”. Aki un rekuerdo kontado por el Sr. Ülkümen el propio:

“...Desde el presipyo del Febrero 1944, los aviones alemanos estavan bolando de serka sovre muestro techo kon un bruido  terrivle... 18 Febrero 1944 Shabat... verso las oras 14.00 sinti las sirenas de alarma. En supeto una grande eksplozyon i sigiendo, nuves imensas de polvo... La pacha syedra miya aryento de sangre... Echi un ojo al derredor, el edifisyo de mi Konsolato no egzistiya entonses... En esto, vide entre las ruvinas, mi mujer i la ayudante, manos i figuras invizivles de sangre, apoyadas una a la otra, kon graves  firidas ...”.

En este bombardamiento muryeron dos fonksyonaryos turkos. La Sra. Mihrimah, espoza del Sr. Ülkümen, estava asperando su primer bebe. Malorozamente, non remetida de sus feridas, muryo unos kuantos mezes despues, metyendo al mundo su ijo Mehmet...

En 19 Julio 1944 el Komandante aleman de Rhodes, anunsyo un dekreto ordenando a todos los ombres djudios de arrekojersen en ... Despues de averles tomado todos los dokumentos fueron aprezados, kon la mentira ke esto era provizoryo, antes de ser transferados a Atena!!. Los malorozos estavan  inkonsyentes de la prekaridad de sus kondisyones. Portanto Selahattin Ülkümen saviya muy bien ke esto iva ser el “ultimo viaje” de kaji 2.000 djudios... En su entrevista kon el Komandante Kleeman, protesto la arrestasyon de los djudios, sujetos turkos. Kon bastante de ozadiya ekspliko su argumento lojiko: La Republika Turka  ke aviya kedado “neutre”, no era parte en esta gerra. Ansi reusho a salvar 42 djudios del ginnam de Auschwitz... 24Julio 1944 , 1673 djudios de una Komunidad ke bivyo 4 Siglos en la Isla Rhodes, fueron embiyados al kampo de la muerte, 150 reusheron a kedar en vida....

Sintiremos  el Sr. Ülkümen: “...Pude salvar 39 barkeros turkos de ser egzekutidos, i 42 Djudios de ser embiyados a sus “ultimo viaje”. Estos kompatriotes miyos, a kada okazyon no mankan de amostrarme sus rekonosensya. Los anyos sigientes estos  sentimyentos de gratitud fueron  mi grande rekompensa moral de los anyos espinozos de mi vida profesyonal...”    

Todos sintimos gratitud enfrente d’un djesto semejante. En la nochada de la resepsyon del 500. anyo de la Ekspulsyon, organizada en el Palasyo Dolmabahçe, Sr. Ülkümen fue envitado d’onor i Va... lo akompanyo. Notavles de muestra Komunidad syempre tuvyeron kudyo de el i de su salud, en el Ospital Or- Ahayim, ande fue muy bien mirado. Lo vijitavan tambien en la “Kaza de Retretados” (Emekli Sandığı) de Etiler, ande i yo lo vide. Muryo el 7 Junio 2003 a la edad de 89.

La Komunidad Djudia de Rhodes ekspreso su grande agradesimyento, el 24 Julio 2008 kon una seremoniya komemorativa i inoguro el monumento a la memorya de Ülkümen. Malorozamente, a la epoka el evento no se sintyo muncho en la prensa. Selahattin Ülkümen una persona modesta, uzava  dezir ke lo ke izo fue solamente “sintir la boz de su konsensya”...

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
520