Es ke el amor maternal es un instinto natural, renforsado por elementos sosyales propyos al ambiente ande evolua la madre?
O byen es ke este mizmo amor es un sentimyento totalmente konstruido sosyalmente?
La filozofa franseza Elisabeth Badinter (byen konosida por sus teorias feministas i su lucha sin limite por la libertad absoluta de la mujer ansi ke por una kompleta igualidad entre mujeres i ombres) afirma ke no se trata en ningun kavzo de un instinto natural, ma simplemente de un sentimyento sosyalmente institusyonalizado de la relasyon madre/rezin nasido.
Por kontra, Sarah Blaffer Hrdy, selebre antropologa i primatologa, myembro de
No se si un dia se puedra topar la djusta repuesta a esta kontroversya , en todo kavzo personalmente no parvengo a entender la filozofa Elizabeth Badenter , kuando (en su lucha ardyente por la absoluta emansipasyon de la mujer) eya prekoniza a la “madre” de liberarse del uzo de alechar su ninyo.
Su objetivo es la total libertad de la mujer sin ninguna sumisyon a kualkyer ovligo impozado por las tradisyones, ovligo ke puedra impedir el libre korso de su programa de vida.
En repuesta, se puede objektar ke “alechar su ninyo”, aunke un poko fatigante, no konstitue una karga partikularmente penivle para la mujer, ma al kontraryo un momento de komunyon entre eya i el muevo nasido, un momento de intensa proksimidad entre una mujer mas o memos rika de una syerta eksperyensa afektiva i una kriansa ainda sin defensa, ke eya yevo 9 mezes en sus entranyas i a la kuala la madre syente el menester imperyozo de todo dar sin nada asperar.
Deke kerer amenguar la intensidad de esta emosyon ande la mujer ayega al punto kulminante de su feminidad?
No se puede nyegar ke “luchar por la igualidad de los derechos entre ombre i mujeres” es sin dubyo un paso enorme echo en el kampo de la sivilizasyon humana . Partikularmente en el mundo oksidental, la mujer moderna ya tomo konsensya de sus derechos i evoluo inkontestavlemente en su manera de pensar; eya lucha otomatikamente kontra kualkyer diskriminasyon, sin malorozamente obtener syempre un rezultado pozitivo, ma a kada kombate del kual eya sale viktoryoza o mizmo vensida, un muevo adelantamyento se inskrive en el programa de su emansipasyon.
Ma deke privarla de todas las partikularidades ke la renden diferente del ombre? Eyas konstituen un pedaso esensyal de su personalidad. De mezmo deke impozarle indirektamente (a la favor de una retorika muy savya ma sin verdadera nesesidad) una linya de kondukta realmente artifisyal? Eske no sera mijor i puede ser mas adekuado a este mizmo programa de liberasyon, de desharla libre de eskojer?
