Terrivle dezolasyon en Haiti

Klara PERAHYA Judeo-Espanyol
20 Ocak 2010 Çarşamba

Komo ya lo meldimos todos en la prensa turka komo estranjera, Haiti se topa en este momente en un  estado de kaos indeskriptivle ... En kada sentimetro de tyerra: la ambrera, la sed, el espanto i la dezesperansa... embasho, sovre las pyedras manchadas de sangre, ferridos ke asperan ayudo debasho un sol kemador, keshas de mas a mas flakas kaji silensyozas ke  suven de debasho las ruinas... en pyes, immoviles komo si pyedreron el uzaje de sus pyernas, madres ke asperan sin esperansa sus ijos ... unos kuantos pasos mas leshos, komo una replika  inhumana, guerfanos desmamparados ke no tyenen la huersa de yorar...

I komo si esto no bastava (konsekuensa inevitavle de una sufriensa ke ayego a su punto el mas alto) la revolta feros de una manseves ke peryo sus puntos de apoyo i sus referensyas morales, la ravya, esta violensa irrezistivle  ke solamente la “dolor sin ninguna perspektiva pozitiva” aze suvir de las  onduras oskuras de la persona... pletos, sakeos, rovos i lo mas terrivle, munchas vezes, la indiferensya enverso el amigo de ayer ke demanda ayudo.

Deke son kaji syempre los mizmos, los ke (desde sus nasimyento) paresen yevar sovre sus ombros la karga la mas pezgada del suerte humano? Deke este destino syego i sodro a los  djemidos de los flakos?... A ken la kulpa?... Es ke se pudia preveer este teremoto?... Es ke se pudia impedir esta desgrasya o a lo menos  limitarla?

 En el mez de Mayo 2004, el payis ya avia una primera vez somportado graves pedritas humanas  provokadas por  luvyas diluvyanas (1220 muertos) i por la segunda vez, en septembre del mizmo anyo un muevo dezastre (1160 kadavres i 1230 pedridos) kavzado por una una terrivle tempesta.

Inkontestavlemente el ayudo de los “Estados Unidos”, de la” Fransya” i de “munchos otros payizes evropeos”, komo “del vezindado” es enorme ma no bastante... los prezidentes Obama, Bush i Bill Klinton  se adjuntaron para demandar ayudo personal del puevlo ..En este momento, aviones yenos de komanya, agua de bever i personal medikal, shirurjyanos, enfirmyeros, ets... ansi ke de materyal de urjensya, komo: kuras, hospitales portativos, kamas, mantas, tyendas i ainda mas, se pozan kada dia sovre la pista de aterrisaje medya derrokada ma kontinualmente yena de movimyento ...

 Ma ke sera el avenir de este puevlo sovre una tyerra sin estabilidad ni seguridad, avyerta a todo modo de kapricho imprevizivle de la atmosfera?... Ke esperansa puede tener un puevlo sin real infrastruktura profesyonal agrikolo o industrial?

Ande ke mos topemos serka o leshos, ken ke seamos, estas kestyones mos konsernan i  mos akosan...