Alüminyum Hurda Geri Dönüşüm

Galata o Nişantaş?

Galata o Nişantaş?

Por el primer teksto del anyo, eskrivir una koza komo diziya mi kerida madre: “ke mos va achilear el korason”, ma kualo? Echando un ojo a la aktualidad, lo ke se pasa en vuestro derredor, ay probabilidades de topar un sujeto. Alora avlaremos de aktividades ke tyenen lugar en dos distriktos d’Estambol, ke  syempre estuvyeron en mi egzistensya... A primera vista no tienen nada de komun, mas ke ser sentros istorikos. Por el resto son (o eran?) komo preto i blanko. El 25 Desembre estuve en Galata, esperando arrekojer las informasyones ke vash a meldar. Galata... muevo sentro d’atraksyon (çekim alanı) de los kreatores de Moda, de los patrones de restoran, kafé ets...

Tengo nombrozos rekuerdos d’estas kalejas de mi chikez i  manseves. Kero relatar uno, el primer enkontro d’una chika de Galata kon Nişantaş, anyos 1944-45... Meldando en una eskola primera del Estado, teniya i amigitas muzulmanas. Visto muestra edad, no eramos permetidas d’estar en las kayes despues la eskola, syendo ke eran anyos de gerra. Mi madre era muy rigoroza, espesyalmente la perioda de 20 Klasas, mi padre estando leshos. Kon su retorno, la interdiksyon s’aflosho grasyas a Ülkü, una amigita muzulmana, moderna, de buena situasyon.

En vezes a kondisyon de traerme la dada d’Ülkü a kaza, mis paryentes me permetiyan de irme a su kaza, serka el Tunel. El anyo k’estavamos para eskapar la 5ena se mudaron a Nişantaş. Por evitarle difikultades d’adaptasyon, no la trokaron d’eskola. Ansi, konosi en el 44 Nişantaş, ande bivo desde mas de 56 anyos.

Un Alhad el shofor me tomo de kaza, prometyendo a mi padre de traerme oras de tadre... Vinimos a una fragua komo un palasyo a mis ojos, Oy en diya egziste esta fragua orijinal, enfrente el parko de Harbiye. Ay debasho el famozo restoran “Yekta”. En mis vijitas, mi konosensya de Nişantaş se limito kon este lugar i el derredor serkano.

Kontinuando kon Galata, avlaremos del punto komun ke tiene entonses kon Nişantaş. El mas “chic” Festival de Moda de la sivdad, tuvo lugar en Galata entre 9-13 Desembre, kon el nombre “Galatamoda”. Las kalejas de mi chikez estan trokando de karakter, el sentro en una evolusyon ke ampeso kon el primer Festival en 2007. La plasa ke serviya de garaj a los kamiones, se transformo en un lugar d’enkontro kon la Moda.

Komo se arrivo a esto? En 2006 kon la inisyativa del Prezidente de la Munisipalidad de Beyoğlu, en el kuadro de los lavoros estruktural de renovasyon del distrikto. Tuvyeron entrevistas kon la Asosyasyon de Stilistos de Moda, uvo interkambios de ideas, opiniones... Finalmente alkansaron a un akordo sovre el Proyekto d’un Festival de Moda en la plasa de la Torre de Galata.

Ampesaron las restorasyones de las fraguas, dos kalejas dando a la plasa fueron serradas al trafiko, kuatro otras se renovaron. 2007 fue anyo d’inogurasyon de “Galatamoda”. Entervalo syertas botikas o depos trokando de posesor, se izyeron atelyes de los stilistas. Akel anyo, Galata echo sus primeros pasos en el kamino de la kreasyon i kontinuo kon magazenes, “boutiques” de moda ets...

Asigun los enteresados, la situasyon aktuala esta dando esperansas optimistas. En un espasyo de 1200m2, se fondyo un İnstituto de Moda. En esta vijita no pude ver todo. Una renomada eskola de Paris, “Es Mode” esta bushkando lugar en Galata. Al pareser, d’anyo en anyo esta pujando la partisipasyon al Festival.En los standes al derredor de la Torre, oganyo los vijitadores tuvyeron la  okazyon de konoser las kreasyones Otonyo- İnvyerno 2009-2010. Ansi, los sentros de Galata i Nişantaş tyenen agora otrun punto komun: La Moda, domeno ande, puede ser kon tyempo van a rivalizar. Ken save!!?  Vos sueto salud buena i repozo en 2010. 

(a kontinuar)

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın