Despues de un largo periodo de ezitasyon entre “el esprito de humanizmo i de respekto enverso lo ke yamamos kultura” i “el esprito de oportunizmo politiko de algunas grandes potensyas del mundo”, la nominasyon (versus Faruk Hosni) de Irina Bokova al posto de Direktora del UNESCO es realmente una viktorya moral, komo lo disho tan djustamente Bernard Henri Levy, i tambyen el triunfo de la lojika sovre un vyejo prejuisyo anti -feministo..
Antes la eleksyon, la lucha fue fuerte, mizmo doloroza. Seguro de su viktorya immedyata , Faruk Hosniaparesyo el primer dia delantre los elektores, vestido por la sirkunstansya, la kara radyante, komo un kombatante ke no dubya de su viktorya. .Su nominasyon ya avia obtenido el konsentimyento de la mas parte de potensyas evropeas, de numerozos governos Afrikanos i sin dubyo del mundo arabo en su totalidad; mizmo Israel prometyo de no intervenir negativamente, malgrado la desgrasyada fraze kel kandidato avia pronunsyado el anyo pasado, asegurando sus kompatriotos de kemar kualkyer livro eskrito en Ebreo ke se topara por azardo en alguna biblioteka del payis.
Aunke ombre de grande saveduria, el ignorava probavlemente ke kemar livros es un akto sakrilejyo ke konstitue en munchos kavzos el premisyo de krimines kontra la Humanidad.
Ay de esto unos kuantos mezes (komo muestra gazeta lo avia eskrito en esta mizma pajina, debasho la mizma rubrika) un punyado de intelektuales, sodros a kualkyer motivo de alto interes diplomatiko, se revoltaron kontra la posibilidad de una semejante nominasyon,... Entre eyos tres grandes pensadores djudyos: Elie Wiesel, Claude Lanzman i Bernard Henri Levy, ke aparejaron immedyatamente una letra de fuerte protestasyon .
Tres ombres de grande ideal etiko, tres sinyaturas debasho un teksto eskrito sovre una oja blanka de papel kon grande konviksyon ma kaji sin ninguna esperansa, parvinyeron a despertar la konsensya de munchos elektores
Poko a poko otros intelektuales se adjuntaron a eyos en toda objektividad . Sin menospresyo ni prejuisyo, bazandosen sovre faktos reales, eyos tambyen refuzaron la nominasyon de un antisemito a la kavesa del Unesko, institusyon mundyal de lakuala la mas grande funksyon es la Edukasyon i el Respekto de la kultura en toda su diversidad
Un dia antes los votos, los ke sigyeron de serka o de leshos los aparejos de esta eleksyon estavan seguros kel delegado de Ayifto iva ser elijido immedyatamente al primer torno, ma esto no fue el kavzo, ni la segunda vez, ni la tresera , ni la kuatrena ... gradualmente la distansya se amenguo entre los partisipantes, algunos progresivamente travaron sus kandidatura al profito de la reprezentante Bulgara... se persivyo una perpleksidad entre los votantes, komo si avian enfin realizado la gravidad de la situasyon .
Esto mos ambeza munchas kozas ... mos ambeza de nunka renunsyar a lo ke savemos ser lo “djusto”, i sovre todo a luchar por muestras konviksyones morales mizmo sin ninguna esperansa de reushir. Alhad pasado, tuve la okazyon de segir sovre la televizyon Franseza, una entrevista de Irına Bokova kon tres gazeteros ... Mujer muy serya, direkta en sus repuestas todo en kedando muy diskreta,.eya refuzo kategorikamente de avlar de la polemika a la sigida de lakuala eya avia sido elijida , preferando komunikar a sus oditores su proyekto de asegurar el maksimum de umanizmo i de respekto mutual posivle entre las varias sivilizasyones afin de evitar una kualkyera separasyon entre eyas.
Grande amiga de Simone Veil, su prinsipal objetivo es la solidaridad multikultural sin menospresyo ni prejuisyo, en el respekto de las tradisyones, uzos i kostumbres de kada myembro…
