Komo ya devino kaji una ermoza tradisyon, un pranso de İftar (kortadura de Tanit Muzulmano) fue organizado Myerkoles pasado el 2 del mez koryente en el Sentro de kultura “Neve Şalom” en honor de las altas Otoridades Muzulmanas de muestra Sivdad.
Enkavesado por los shefes relijyozos i komunitaryos djudyos, el fue komo kada anyo el simbolo de la grande amistad i komprensyon mutual ke ata muestra kolektividad a su payis, desde mas ke sinko siglos.
El Pranso fue realsado por la prezensya del Arkitekto Kadir Topbaş, Prefekto Jeneral de Estambol, ansi ke por la mas parte de prefektos de varios distritos, komo tambyen sus kolavoradores , i munchos otros altos funksyonaryos de la Administrasyon munisipal de Estambol.
Eran prezentes: el Gran Rabbino Rav Isak Haleva , los diferentes myembros del Betdin, los dirijentes de nombrozas asosyasyones djudias i numerozos notavles.
Los kombidados fueron resividos kon konvivyalidad i kontentez por Silvyo Ovadya prezidente de muestra komunidad i sus serkanos kolavoradores.
El servisyo del Pranso empeso kon el Ezan (orasyon de kortadura de Tanit) en una atmosfera de konsentrasyon espiritual, de fuerte amistad i de grande konsiderasyon resiproka .
Tres ermozos diskorsos muy sinyifikativos fueron pronunsyados ke konsolidaron ainda mas los sentimyentos de byen kerensya ke syempre egzistyeron en este inkomparavle punto del mundo vyejo de milenaryos kon su ermozura natural i el alto nivel de su historya.
Yusuf Altıntaş sekretaryo jeneral del Gran-Rabbino meldo los mensajes de amistad de Ahmet Misbah Demircan prefeto de Beyoğlu, de Aziz Papuççu prezidente del departamento del AKP en Estambol, ansi kel de Ali Müfit Gürtuna i despues invito “Rav İsak Haleva”, “Silvyo Ovadya” i “Mimar Kadir Topbaş” a tomar la palavra.
En su diskorso, el Prefeto Jeneral de Estambol afirmo su alegria de toparse prezente i deklaro ke servir la sivdad de Estambol kontyene un potensyal espesyal de satisfaksyon.
Kon su situasyon jeografika, su esplendida natura i sus valores populares esta parte del mundo fue i es ainda oy, el lugar de enkontro de varias sivilizasyones , kulturas i relijyones ke parvyenen a bivir en una atmosfer de serenidad i verdadera paz, ansi ke en un esprito de perfekto respekto mutual, i esto konstitue el mijor remedyo de venser i rezolver las difikultades de muestros tyempos.
El Gran Rabbino Rav Isak Haleva disho “En realidad” bivir en un esprito de armonia i de ermandad se topa en los jenes de este payis, de su tyerra i de su puevlo.
De su parte, en su diskorso, despues de aver konfirmado el atamyento indefektivle de la komunidad djudia al payis ke 500 anyos antes avia resivido kon grande konvivyalidad muestros avuelos ekspulsados de Espanya, el prezidente Silvyo Ovadya afirmo ke muestros korelijyonaryos kedaron syempre muy fideles a la Turkia ...lo ke konfirmaron el Prezidente Abdullah Gül i el Primer ministroRecep Tayyip Erdoğan kuando, durante los konfliktos del Oriente Medyo, una partida de la populasyon Turka ansi ke varios kotidyanos asimilaron los djudyos a los Israelyanos lo ke kreo envezes situasyones problematikas.
El Dyo ke bendiga syempre esta amistad i ke eya syerva de egzempyo en varios otros lugares del mundo.
