Tisha Beav dia de dolyo, dia de kestyonamyento

Klara PERAHYA Judeo-Espanyol
29 Temmuz 2009 Çarşamba

En unos kuantos dias “Tisha-Beav” komemorasyon de las sufriensas de muestro puevlo en el pasado...del derrokiyo del primer templo en el anyo 586 antes la epoka Kristytana, sovre orden de Nabuchodonosor, i 656 anyos mas tadre: destruksyon del segundo templo sovre orden de Titus... egzilyo de los djudyos,esparzimyento en varios puntos del mundo, sometimyento a la voluntad de governadores ajenos

 Es bueno de retornar al pasado, muy provechozo espiritualmente, moralmente i mizmo intelektualmente , el mos ayuda a mijor fraguar muestro futuro.

El pasado mos  avre kaminos ...”lo ke semos oy” mos vyene un poko, parsyalmente, de lo ke eramos i pensavamos ayer...el avenir, el verdadero, es envezes una leshana refleksyon de lo ke fue la vida de muestros predesesores en otras sirkunstansyas i en una otra atmosfera...en sus raizes aparesen mas o menos sus  kreensas i sus sagasidad  ...ma en todo kavzo, komo todo modo de kriansa, i el ser umano aktual  evolua i sufre segun las kondisyones de su entorno personal....

La semana de Tisha-Beav   mos mostra la frajilidad del puevlo djudyo...El ombre moderno tyene menester de este periodo de meditasyon, menester de toparse solo, facha kon facha kon varias verdades, leshos de las tentasyones,  de los plazeres i de los problemas de su egzistensya kotidyana

A la kondisyon de no ser un simple otomatizmo ritual i de eliminar todo modo de superstisyon atada a el,   Tisha Beav es mas ke un dia de triste akodro i de lamentasyones, el es un dia ande kada djudyo deve realizar el aislamyento(yalnızlık) del puevlo al kual el apartyene...el es tambyen  un dia de pensamyento en la soledad de un  eternal dialogo kon si mizmo .... alora empesa el  inevitavle kestyonamyento, i mos demandamos “deke?”.

 Deke no adjuntar a estas komemorasyones, “la de la inkizisyon de la Edad Medya en Espanya, ande personas fueron kemadas bivas bivas por aver refuzado de  renunsyar a sus apartenensya al Judaizmo”? ...

 Deke no adjuntar los 6 Milyones de djudyos ke fueron eksterminados ay de esto 50-60 anyos,  por la sola falta de ser djudyos. Es verdad ke oy en dia mos rememoramos fidelmente, en la tristeza la mas absoluta, de sus fin doloroza en el suplisyo, ma ke sera  en el futuro? en los siglos a venir ande el akontesimyento va pedrer de su aktualidad ?

 İ los progromos sanglantes ke presedyeron la Shoha , komo un preludyo trajiko? Kuantas personas lo van a saver, kuantas personas se van  akodrar?...

  Deke la komemorasyon de estas desgrasyas, igualmente semblavles a las de los tyempos biblikos i  ke reflektan tambyen el suerte trajiko de la kondisyon djudia,  no aparesen  komo un imperativo relijyozo absoluto?...

 Una koza ke personalmente no pude nunka entender es “deke despues de la epoka Talmudika , el djudaizmo fue enkavenado”? El portanto kontinuo i  kontinua a bivir , a produzir ovras igualmente de grande valor en el kampo de la Syensya , Medikeria, Sosyolojia, Filozofia.....El es un  ser bivo , pensante, ajisante i trusho muncho a la umanidad...

 Deke blokar los preseptos relijyozos a una epoka ke se topava ainda en el portal de la real evolusyon de la humanidad?

Kon sus  syentifikos modernos i sus filozofos  konsyentes de los derechos del ombre, la sivilizasyon djudia aktual esta trasando el  konsepto de una humanizasyon de dia en dia mas ancha del mundo,  ke avagar, avagar empesara  a respektar el otro.

 Ansi, i las jenerasyones prezentes komo  tambyen las futuras, seran meresyentes de adjuntar sus eksperyensas a las de muestros avuelos.