Problema no solo legal ma tambyen umano i sovre todo sosyal, la polemika dezenkadenada en Fransya a la sigida del veridikto pronunsyado en el procheso İlan Halimi (manseviko djudyo torturado a muerte por un grupo antisemito) se amplifiko i se intensifiko ainda mas, en un senso muevo
Komo espesifikado la semana pasada en esta mizma pajina, en el artikolo konsernando el horrivle krimen perpetrado kontra İlan Halimi, el Crift i otras Asosyasyones djudias terrivlemente desepsyonados por la induljensya eksesiva manifestada enverso varios myembros del grupo otonombrado “Banda de salvajes”, demandaron al ministeryo de la Djustisya de estudyar de muevo el prosedimyento de este kavzo, lo ke fue immediatamente akseptado.
La demanda de la parte del dicho Ministeryo de” reegzaminar una partida de las sentensyas” fue malorozamente kritikada i konsiderada komo una injerensya politika en la Justisya.
En efekto, en todo modo de payiz demokratiko el aparato judisyal es absolutamente otonomo i el governo no tyene ningun derecho de intervenir en kualkyer kavzo.. Dos grandes avokatos djudyos de Fransya lo konfirmaron.
Ma , es ke se trata solo de un simple krimen krapulozo o de un krimen devengansa? No
En realidad, se trata de un kavzo de antisemitizmo, de este vyejo...vyejo odyo kontra el Judaizmo i ansi kontra una partida de la Humanidad.
La partisipasyon direktamente o indirektamente a un semejante krimen es (a mi pareser) una kulpa bastante grande....Eya es una kulpa sosyal i byen entendido moral.
En repuesta a la protestasyon de syertos myembros del Aparato Judisyal Fransez , la ministra de la Djustisya Michele Alliot Marie respondyo ke el intereso sosyal i la paz publika son al orijen de su desizyon.
Eya disho:“Kuando konstati ke las kondanasyones pronunsyadas dan la posibilidad a algunos partisipantes engajados en este krimen, de toparsen libres , djuzgi ke efektivamente ay un problema...”
Inkontestavlemente, el Aparato Judisyal de un payis deve kedar absolutamente libre, lo ke asegura la independensya total del puevlo ...ma ay envezes sirkunstansyas ande (sin viyolar este prinsipoyo sakro) una kontestasyon puede ser formulada.
La Djustisya deve ser antes de todo protektrisa de kada sitizano, de ke orijen o nivel sosyal ke sea, i por esto eya deve syempre ser edukativa ansi ke disuaziva en sirkunstansyas negativas.
