Batya Natan

Kriza ekonomika i vakansas...

Kriza ekonomika i vakansas...

En pasadas eskrivi sovre las distraksyones ke es un menester indispensavle en una vida ekilibrada. Adjusti ke no kale mesklar distraksyon kon vakansas, ke naturalmente i eyas son importantes. Es un menester kaji baziko para la salud moral i fizik. Aze pujar la motivasyon de la persona en su lavoro. Devemos achetar ke azer konje, dar un entervalo al lavorar, remonta el moral en syertos kavzos. Enverano es la emosyon de las vakansas tan dezeadas, asperadas kon despasensya despues de largos mezes de invyerno i lavoros. İ kada uno apareja su program para pueder profitar de esta perioda limitada.

En jeneral, aserkando el mez de Junio, se empesa a guluzinar (heveslenmek) i azer suenyos (hayal etmek) de vakansas. Estos dezeos se transforman en planos i programas. Ken pensa alesharse 10-15 diyas de la sivdad, ir a un otel, ken azer un viyaje al estranjero... Esto siguro kere dizir aparejos, empleos diversos, un poko de rejim en previzyon del “bikini”! ets... Alora “ buenas vakansas”!... Esto todo es (o fue diremos) para los ke tienen la shans, toda posivilidad komo tyempo, salud, remedyos Oy vo avlar espesyalmente de los ke lavoran en una kualkyera institusyon. Eyos fiksan sus datas de konje i se arranjan para informar la direksyon. Esto fue mas o menos asta agora, el prosesus de tomar konje. Un prosesus standart i klasiko... Bueno kualo troko oganyo? Asigun esto sintyendo, el reselo de pyedrer el lavoro esta komo la “Espada de Damokles” sovre sus kavesas. El reselo o espanto, munchas vezes es la razon de anular sus programas, al koste de sakrifikar sus derecho de konje legal.

Es en baldes este reselo o tyene una baza, una razon? Asigun lo ke estamos meldando o sintyendo, malorozamente no es en baldes este espanto de kedar sin echo... Achakes de la kriza ekonomika ke muncha djente peryeron sus empyegos o fueron aleshados del lavoro por una perioda indeterminada (zorunlu izin). Par konsekuensa, en esta atmosfera de konkurrensa,  los ke tyenen un empyego no se estan enkorajando a alesharsen. Konsiderandosen komo mazalozos de tener un lavoro, pensan:“ no vale la pena de tomar el risko de azer unos kuantos diyas de keyf, al koste de peryer mi empyego. Si el patron se rende kuento ke el echo ya esta kaminando malgrado mi absensya, muy probavle ke entonses no me va detener...”

Estos todos penseryos i otros, naturalmente son manaderos de stress. En muestros diyas, la teknolojiya tambien esta “matando” el espirito de vakansas. Supozando ke de una manera ya se salyo en konje. Se estan yevando i el lavoro kon eyos endjuntos. “Laptop” kon todos sus dosyes, telefon sonando a kada momento, un kliente, el patron o un kolego ke tyene una pregunta urdjente ets...

Asigun los psikologos, esto es en kontradiksyon kon la konsepsyon de vakansas. Estan dizyendo ke a lo menos, los 10-15 diyas de konje es el derecho del ke lavora i esta perioda le apartiene a el (o eya). El eskopo prinsipal del konje es liberar el meoyo de la “routine” de kada diya. Lo estamos vyendo, esto no es syempre posivle.

Keridos amigos puede ser ke deskrivi un tablo un poko “eskuro”. Ma es una partida de la realidad aktuala. Siguro ay i el reverso de la medalya. Lo estamos meldando o vyendo en la “ Prensa de Magazin”. Un grupo kontinuando komo syempre, “vur patlasın, çal oynasın”!! Basta echar un ojo a syertos programes de T.V... La kriza ekonomika, al pareser no paso por sus lado!!!...

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
573